သတင်းထူး, သမ္မတရွေးချယ်တင်မြှောက်ရေး မနက်ဖြန်ပြုလုပ်မယ်
လွှတ်တော် အစုအဖွဲ့ သုံးခုက ရွေးချယ်တင်မြှောက်ထားတဲ့ဒုတိယသမ္မတ သုံးဦးထဲက ဘယ်သူ့ကို သမ္မတအဖြစ် ရွေးချယ်တင်မြှောက်မလဲဆိုတဲ့မဲခွဲဆုံးဖြတ်တာကို မနက်ဖြန် ဧပြီလ ၃ ရက်မှာ ပြုလုပ်မယ်လို့ ပြည်ထောင်စုလွှတ်တော်နာယက ဦးအောင်လင်းဒွေးက ကြေညာပါတယ်။
နေပြည်တော်မှာ ဒီနေ့ပြုလုပ်တဲ့ပြည်ထောင်စုလွှတ်တော်အစည်းအဝေးမှာ နာယကက အခုလိုကြေညာတာဖြစ်ပါတယ်။
ဒုသမ္မတသုံးဦးက ပြည်သူ့လွှတ်တော်က တင်မြှောက်ထားတဲ့ ဗိုလ်ချုပ်မှူးကြီးမင်းအောင်လှိုင်၊ အမျိုးသားလွှတ်တော်က တင်မြှောက်ထားတဲ့ နန်းနီနီအေးနဲ့ တပ်မတော်သားအစုအဖွဲ့က တင်မြှောက်ထားတဲ့ စစ်ကော်မရှင် ဝန်ကြီးချုပ် ဦးညိုစောတို့ဖြစ်ပါတယ်။
အစုအဖွဲ့သုံးခုစလုံးက တင်မြှောက်တဲ့ဒီသုံးဦးမှာ နှစ်ဦးက တပ်ကဖြစ်ပြီး နန်းနီနီအေးဟာလည်း ပြည်နယ်လွှတ်တော်အမတ်တစ်ဦး ဖြစ်နေတာ ထူးခြားပါတယ်။
ဦးညိုစောဟာ လက်ရှိစစ်ကော်မရှင်ဝန်ကြီးချုပ်ဖြစ်ပြီး ကြံ့ခိုင်ရေးပါတီက ပြည်သူ့လွှတ်တော်ကိုယ်စားလှယ်ဖြစ်ပေမဲ့ သူ့ကို တပ်ကိုယ်စားလှယ်အဖွဲ့က တင်မြှောက်ခဲ့တာပါ။
ပြည်သူ့လွှတ်တော်က တင်မြှောက်တဲ့ ဒုသမ္မတ ဗိုလ်ချုပ်မှူးကြီးမင်းအောင်လှိုင်ကတော့ ရွေးကောက်ပွဲဝင်မပြိုင်ပေမဲ့ လွှတ်တော်မှာ ကိုယ်စားလှယ်အများဆုံးရှိတဲ့ပြည်သူ့လွှတ်တော်က တင်တဲ့ဒုသမ္မတ ဖြစ်ပါတယ်။
