Haleellaan Iraan irratti baname akkamiin guutummaa addunyaa raasuu danda'u?

**Erga jalqabamee torban sadaffaa kan seene "Operation Epic Fury" guutummaa addunyaatti dhiibbaa uumaa jira.

Duulli fedhii balastik misaa'el, humna galaanaafi meeshaa waraanaa nukilaraa Iraan karaatti hambisuuf jedhamee jalqabame tasgabbii dhabuu naannoofi dhiibbaa dinagdee addunuaa uumaa jira.

Haleellaawwan qolleensaa gurguddoo raawwatamanillee mootummaan Iraan garuu aangoo isaarraa hin kaane. Adeemsi haaraafi balaafamaa ta'es mul'achaa jiru.

Duula Tiraamp "gabaabaa ta'a" jedheen Bahi Giddugaleessaa goolamaa jira.

Iraanota Doonaald Tiraamp"mootummaa keessan to'adhaa" jedheef amma yeroo isaa hamaa ta'eera.

Balaa Iraan ni qaqqabsiisti jedhamu ni jira. Iraan ballina lafaan ida'ama ollootashee Afgaanistaaniifi Iraaq ni caalti.Duula Ameerikaan biyyoota lamaan keessatti gaggeessite walxaxaafi waggoota kan lakkoofsise ture.

Qabeenyi waraanaashee akka sagantaa nuukilaraaa kutaalee biyyattii garagaraatti faca'anii jiraachuu isaaniitiin ol tokko tokko kuusaa tulluuwwan jala jiran keessa dhokataniiru.

Ummannishee miliyoona 90 ta'an garaagaraa yoo ta'an, gara walakkaan isaanii garuu lammiilee Perzhiyaanotadha.. Akkasumas, lammiilee Azarbaajaan, Kurdootaafi Araboota muraasa of keessatti qabata.

Mootumman Islaamummaa bara 1979 aangoo qabate, sirriitti kan ijaarame, ayidooloojiin kan caaseffameefi kan sirriitti gurmaa'edha.

Ebla bara 2024 irraa eegalee haleellaa afur Israa’eliin , tokko ammoo Ameerikaatiin raawwatamus, mormii guddaa ji’a Muddee keessa dhohe mo’atee aangoorra turuu danda’uusaa agarsiiseera.

Ji'a Muddee mormitoonni hiriira bahan wayita ajjeefamanitti "gargaarsi dhufaa jira" jechuu dhaga'aniiru.

Guraandhala dhuma yeroo qaqqabetti, tokko tokko gammachuusaanii ibsatan. Viidiyoowwan ajjeefamuu hogganaa waliigalaa Iraanota gammachuu ibsatan agarsiisu baheera.

Garuu lakkoofsi namoota nagaa du'anii dabalaa dhufuun abdiin naasuufi sodaadhaaf bakka gadhiise. Haleellaan xiyyaaraa magaalaa Minaab keessatti raawwatameen lubbuun namoota 160 kan galaafate yoo ta'u, irra caalaan isaanii daa'imman. Gama biraatiin ammoo baha Tehraan keessatti gamoo jige jalatti namoota lubbuun hafan barbaaduun itti fufee jira.

DhaabbanniBiyyoota Gamtoomanii akka jedhetti, namoonni miiliyoona 3.2 ta’an waraana kanaan buqqa’aniiru, yoo xiqqaate namoonni kuma 800 ta’an ammoo akeekkachiisa Israa’el hordofuun qe’ee isaanii kibba Libaanosirraa baqataniiru.

Warri waraana kana jalqabanis miidhaan isaa itti dhagahamuu jalqabeera.. US fi Israa'el loltoota muraasa dhabaniiru. Haleellaan Iraan gaaddisa Beeyit Shemesh keessatti lammiilee Israa’el sagal galaafate, namoota nagaas miidheera.

Ameerikaan erga waraana Iraaq bara 2003 booda dooniiwwan waraanaafi xiyyaarota waraanaa dabalatee torban hedduudhaaf naannoo Iraanitti shaakala waraanaa guddaa gaggeessaa turte.

Israa’elii fi Ameerikaan meeshaa waraanaa humna guddaa qabuufi ittisa Iraan balleessuu danda’u hidhatanii jiru. Misaa'ela fageenyarraa furguggifamuu danda'uufi galma isaanii darbuu danda'an of hidhachiisaniiru. Kuusaan boombii isaanii waan hin dhumne fakkaata.

Iraan misaa'ela balistikiifi diroonii hedduu hidhattee turte. Maallaqa qusachuuf ta'us ta'uu baatus torban lamaan darban keessatti lakkoofsa itti fayyadamu hir'istee jira.

Meeshaa waraanaa akka diroonii dhoksaa dhiheenya kana galaanarratti bobbaafamanis qaba. Isaan kun adda baasuun rakkisaa waan ta’eef balleessuun rakkisaadha. Kanarraa kan ka’e waraanni sun dheerachuu danda’a.

Bu’aan waraana kanaa haala mootummaan Ameerikaa hin eegneen diinagdee addunyaa raasuu eegaleera.

Boba’aan addunyaa dhibbeentaa 20 kan keessa darbu Ulaan Hormuuz cufameera.

Ujummoon boba’aa Sa’udii gara Galaana Diimaatti geessufi daandii xiqqaan gara Galoo Galaana Omaanitti geessu karaa Yunaayitid Arab Emireetis yeroo dhiyootti gufuu kana mo’uuf gargaara. Gidduu kana garuu dhiyeessii boba’aafi gaazii addunyaa guutuutti addaan cituun mudateera.

Aveeshiniirraa kaasee hanga qonnaatti; pilaastikiirraa kaasee hanga fe’umsa deddeebisuuttii, golee dinagdee addunyaa miidhaan rakkoo kanaa ammallee itti hin dhaga’amne hin jiru.

Filiippiinsitti qondaaltonni tokko tokko torbanitti guyyaa afur imala hir'isuuf hojjechaa jiru. Taayilaanditti fayyadama humna ibsaa hir'isuuf waajjiraalee mootummaa keessatti qilleensa kan qabbaneessu hir'ifameera. Mootummaan waraanaa Miyanmaar konkolaattonni dhuunfaa guyyoota wal jijjiiran qofa akka hojjetan ajajeera, guyyaa tokko boqonnaa akka qabaatanis godheera..

Biriteen fi Awurooppaatti dhaabbileen anniisaa rakkoo kanarraa bu’aa argachaa jiru yaaddoo jedhuun mootummoonni daballii gatii akka to’atan himaniiru.

Tiraamp gatii boba'aa hir'suuf waadaa seenullee, Ameerikaatti gatiin boba'aa dabalaa jira.

Tuurizimiin biyyoota biroo keessattis akka malee jeeqameera, kanneen keessaa Qaataar fi Yunaayitid Arab Emireetis, kanneen wiirtuu turizimii addunyaa ta’an. Buufatni Xiyyaaraa Dubaay walakkaa bara 2025 keessa guyyaa guyyaan imaltoota miliyoona afurtamaa kan qabate yoo ta’u, irra deddeebiin diroonii Iraaniin irratti xiyyeeffatamaa tureera.

Erga waraanni kun jalqabee turistoonniifi jiraattonni kuma kudhaniin lakkaa'aman naannoo sanaa baqataniiru.

Guyyoota darban dooniiwan boba'aa fe'an misaa'ela Iraan fi bidiruuwwan saffisaan yoo rukutaman argineerra. Weerara cimaa Israa’elii fi Ameerikaa mudateen Iraan karaa salphaa, gatii salphaa, garuu bu’a qabeessa ta’een deebii kennuu murteessiteetti.

Lola kana kan barbaadan biyyoota lama qofa. Ministirri Muummee Israa’el Beeniyaamin Netaaniyaahuu fi lammiileen Israa’el hedduun biyya jiraachuu mootummaa Yihudootaaf yaaddoo ta’uu ishee ilaalan injifachuuf fedhii waggoota kurnan lamaan darbaniif qaban hin dhoksaniiru. Doonaald Tiraamp hawwii nuukilaraa Iraan al tokkoof fashaleessuu barbaadu.

Hoggantoonni lamaan kaayyoo waloo yoo qabaatanillee waan itti aanurratti baay'ee yaadaa jiraachuu fi dhiisuun isaanii ifa miti. Lamaanuu waa’ee ummanni Iraan hiree ofii to’achuu isaa jechoota ifa hin taane dubbataniiru, garuu jeequmsi waraanni fiduu danda’u waan isaan yaaddessu hin fakkaatu.

Sa’ud Arabiyaa fi Yunaayitid Arab Emireetis dabalatee michoonni Galoo Galaana Waashingitan waraana kanaan rifataniiru. Irra caalaan isaanii Iraan shakkii fi sodaadhaan ilaalu, garuu ollaa isaanii hundee jabaa qabu waliin jiraachuu barataniiru. Iraan addunyaa tasgabbii dhabsiisuu akka dandeessu sirriitti beeku, garuu humnatti fayyadamuurra furmaata mariitiin argachuu filatu. Omaan sagantaa nuukilaraa isaanii irratti Ameerikaa fi Iraan gidduutti waliigaltee uumuuf jiddu galeessa waan taatee turte. Haleellaa kun jalqanuuf sa'aatii muraasa dura, ministirri dhimma alaa televijiinii Ameerikaa irratti mul'achuun, waliigalteen kun ''harka keenya keessa jira'' jechuun waldhabdee kana salphisuuf abdachuun ture.

Michoonni Ameerikaa biroos filannoo ulfaataatu isaan mudachaa jira. Lola irraa fagaachuu fi dantaa UK fi michoota ishee eeguu keessaa filachuuf akka Ministira Muummee Sir Kiir Istaarmer cimee qabsaa’e hin jiru. Barbaachisummaan doonii waraanaa gara naannichaa erguun seeraan sirrii ta’uu kan danda’u ta’us, rakkoon kana gochuu irratti mul’ate rakkina humna galaanaa Biriteen yeroo tokko maqaa gaarii qabu mul’isee jira.

Raashiyaan michoota Tehraan miidhaa Iraanrra ga’eef gaabbuu danda’an keessaa tokko yoo taatu, galiin boba’aa haala hin eegamneen dabaluu isaatiin Mooskoof maallaqa waraana Yukireen keessatti baasii guddaa baasu maallaqaan gargaaruu dandeessi.

Addunyaa irratti boba’aa Iraan bituun guddaa kan taate Chaayinaan amma madda boba’aa gatii guddaa qabu kan biraa barbaadaa jirti. Beejiingis haleellaa ''michuu tarsiimoo hunda galeessa'' ishee irratti raawwatamu ittisuu hin dandeenye.

Pirezidaantonni Ameerikaa walitti aansuun gara Eeshiyaatti “xiyyeeffannaa” gochuun qormaata dinagdee fi waraanaa Chaayinaan guddachaa jiru kanaan dhufu qolachuuf hojjechuun barbaachisaa ta’uu dubbataniiru. Waraanni Iraan keessatti geggeeffamaa jiru ammas Baha Giddugaleessaa karaalee Ameerikaa itti harkisan bal’aa ta’uu agarsiiseera.Tarsiimoon nageenya biyyaalessaa Tiraamp Sadaasa darbe maxxanfame Iraan naannoo “baay’ee laafaa” ta’uu ishee ilaaluun, Baha Giddugaleessaa naannoo jijjiirama hin qabne taasiseera.

Gabaasni kun itti dabaluudhaan, “Guyyoonni imaammata alaa Ameerikaa yeroo dheeraa fi gabaabaa irratti Baha Giddugaleessaan ol’aantummaa qaba ture darbeera” jedheera.