'Iraan waliigaltee akka fudhattuuf Tiraamp haleellaa murtaa'aa irratti gaggeessuuf yaadaa jira'

Haguuggii Tamsaasa Kallattii

1. 21 Guraandhala 2026Bulchiinsi Yeroo Naannoo Tigraay Raayyaan ittisaa Izii Kaaba akka buufatu waliigaleera jedhamuu morme

   

   Madda suuraa, Office of the President-Tigray

   Bulchiinsi Yeroo Naannoo Tigraay odeeffannoon Raayyaan Ittisa Itoophiyaa Naannoo Tigraay akka seenuuf Mootummaan Federaalaa ajaja dabarseera jechuun odeeffannoo tamsa’e “guutumaan guututti soba” jedheera.

   Hogganaan bulchiinsichaa Letenaal Jeneraal Taaddesee Werredeen durfamu ibsa Sambata har'aa fuula Feesbuukii Waajjira Pireezidaantii Mootummaa Naannichaarratti maxxanseen beeksiseera.

   Dhiheenya kana humni ittisaa Itoophiyaa naannoo Tigraay akka seenu mootummaan federaalaa bulchiinsa yeroof beeksisuusaa odeeffannoon miidiyaalee hawaasaa adda addaa irratti qoodamaa ture

   Kaleessas Raayyaa Ittisaa kaampii naannichaa keessatti bobbaasuuf walii galtee irra ga’amuu isaa kan ibsu barreeffamni biraa maxxanfamee ture

   Bulchiinsi yeroo ibsa har’a baaseen himannaa kana lamaan haaleera. Ibsichi “Mootummaan federaalaa Raayyaan Ittisa Itoophiyaa akka Tigraay seenu ajajee jira” jechuun odeeffannoon tamsa’aa akka jiru hubachiiseera.

   ''Bulchiinsa Yeroo Tigraays akkuma kaampii Ajaja Kaabaa duraanii keessatti waliigalame karaa adda addaatiin bobbaafamaa jira,'' jedhan.

   Bulchiinsi yeroo, maxxansaalee miidiyaa hawaasaa kana “jal’aa fi dogoggorsaa” jedhee kan waame yoo ta'u, “tarsiimoon, madda, fi kaayyoo yaadame” odeeffannoo akkanaa ummata biraan ga’uu duuba jiru ifaadha jedheera.

   "Bulchiinsi yeroo Tigraay odeeffannoon tamsa'aa jiru guutummaatti soba ta'uu ibsuu barbaada," jechuun dabalee ibseera.

   Waajjirri Pireezidaantii Letenaant Jeneraal Taaddasee ibsa kana kan baase waldhabdeen mootummaa federaalaa fi humnoota Tigraay gidduu jiru gara walitti bu’iinsaatti guddachuu akka danda’u yaaddoon wayita dabalettidha.

   Ji'a Amajjii keessa humnoonni federaalaa fi Tigraay naannoolee daangaa Amaaraa fi Affaar waliin daangessan keessatti walitti dhukaasanii ture.

2. 21 Guraandhala 2026Teediroos Adihaanoom 'nagaaf carraa haa kenninu' jedhan

   

   Madda suuraa, Tedios Adhanom Ghebreyesus

   Hogganaan Dhaabbata Fayyaa Addunyaa Teediroos Adihaanoom ''nagaaf carraa haa kenninu'' jechuun waamicha dhiyeessan.

   Teediroos yaada Afaan Amaaraatiin fuula miidiyaa hawaasaa isaanii gubbaa maxxansaniin ''bu'aan waraanaa du'a, badiisa, buqqaatiifi beela''dha jedhaniiru.

   Dabaluunis ''furmaatni siyaasaa yeroo marayyuu ni jira'' jechuun dhibdee jiruuf falli karaa marii siyaasaa akka argamu dubbatan.

   Haata'u malee waayee waraana kamii akka haasa'aa jiran, nagaaf carraa haa kenninu yeroo jedhanis muddama isa kam ilaalchisee akka dubbachaa jiran ifatti hin keenye.

   Haasaan isaanii kun garuu muddama Kaaba Itoophiyaatti mootummaa federaalaa fi humnoota TPF Ertiraan deeggaramu jedhamu waliin jiru yeroo dabalaa dhufetti dhagaahame.

   Isaaniins muddama Kaaba Itoophiyaa kana jechuu akka hin oolle amanama.

   Teediroos maxxansa isaanii kanaan ''goototni dhugaan nagaa filatu. Nagaaf carraa haa laannu'' jedhaniiru.

3. 20 Guraandhala 2026Ameerikaan aanga'oota Iraan irratti xiyyeeffachuun ishee himame

   

   Madda suuraa, Getty Images

   Ameerikaan haleellaa waraanaa Iraan keessatti raawwatuun aanga'oota biyyattii addatti irratti xiyyeeffachuu dabalatee jijjiirraa mootummaa gaggeessuuf karoora baafachuushee aanga'oonni Ameerikaa lama Reuters'tti himan.

   Aanga'oonni kunneen icciitii ta'uu karoora kanaarraa kan ka'een maqaan isaanii akka hin eeramne kan fedhan yoo ta'u, odeeffannoo dabalataa dubbachuurraa of qusataniiru.

   Haata'u malee, karoorri kun hojiirra kan oolu, pirezidant Tiraamp irraa ajajni yoo darbe qofaa ta'uu ibsaniiru.

   Carraaqqiin dippilomaasii gaggeeffamaa jiru bu'aa argamsiisuu baannaan Ameerikaan gara tarkaanfii loltummaatti akka naanneffattu himamaa kan jiru yoo ta'u, dhaabbileen tikaa Iraan, akkasumas wiirtuuwwan nukilaraa irratti haleellaawwan xiyyeeffachuun torbanootaaf itti fufanii gahheeffamaniif loltoonni Ameerikaa qophaa'aa akka jiran gabaafamaa tureera.

   Torbanoota darban keessa Tiraamp meeshaalee waraanaa guddaa gara Baha Giddugaleessaatti akka socho'an godheera. Haata'u malee, humnishee guddaan dooniiwwan waraanaa gurguddoofi xiyyaarota waraanaarratti kan hundaa'edha.

   Ameerikaan tarkaanfii waraanaa IRaan irratti yoo bante aanga'oonni olaanoo biyyattii akka irratti xiyyeeffatamu himamaa jira. Israa'el waggaa darbe Iraan irratti haleellaa yeroo gaggeessitetti hoggantoota waraanaafi siyaasaa irratti miidhaa guddaa geessifteetti.

   Karoora duula Iraan irratri gaggeeffamu Reuters'f kan ibsan aanga'oonni kunneen, Ameerikaan hoggantoota Iraan irratti xiyyeeffannaa gochuuf kan ishee dandeessisu odeeffannoo madda amansiisaa akkamii akka qaban hin ibsine.

   Karoora Ameerikaa ilaalchisee Reuters Waayit Hawusiifi Miinisteera Ittisaarraa adeebii argachuuf gaaffii dhiyeessee battalumatti deebii hin argatiin jira.

4. 20 Guraandhala 2026Amma nu gahe, NASA'n jalqaba Bitootessaa nama gara Addeessaatti erguuf

   

   Madda suuraa, Reuters

   NASA'n waggaa 50 as yeroo jalqabaatiif Bitootessa 6 garee gara Addeessaa deemee naannawaa sana qoratu erguuf. Kun ammoo seenaa dhala namaa keessatti imala gara hawwaatti taasifame isa addaa ta'a jedhameera.

   Ergamni Artemis II jedhame kun qorattoota hawaa afur Addeessaan duuba bakka fagoo ta'e deemanii guyyoota 10f ruranii gara Dacheetti deebiyu. Kun ammoo gara fuula duraatti akkamitti akka ji'arra ba'uun danda'amuuf karaa saaqa jedhameera.

   NASA'n guyyaa itti namoota naannoo Addeessaatti erguuf jiru kana kan qabate erga "shaakalli uffata qorraa uffachuun taasifamaa ture" milkaa'een booda yoo ta'u, yaaliin kun ammoo tartiibaan rookeetii boba'aan guutamee taasifamedha.

5. 20 Guraandhala 2026Jaappaanitti namni eenyummaansaa hin beekamne warqii dolaara mil. 3.6 baasu suphaa bishaan magaalaaf arjoome

   

   Madda suuraa, Osaka City Waterworks Bureau

   Jaappaanitti waanti ta'e kun raajidhuma. Suphaa bishaan magaalaaf maallaqa barbaachisuu namni eenyummaansaa hin beekamne warqee kg21 arjoome.

   Warqeen kun maallaqatti yoo shallagamu dolaara miliyeena 3.6 kan baasudha. Namni eenyummaansaa akka hin baramne dhoksuun warqee arjoome kun bishaan magaalaa Osaakaa suphuuf akka oolufi.

   Kantiibaan magaalattii Hideyuukii Yokoyaamaa ibsa gaazexeessitootaaf kennaniin, namni kun ji'a Sadaasaa darbe keessa ture kan arjoome.

   Magaalaan Osaakaa maagalota gurguddoo Jaappaan keessaa ishee sadaffaa yoo taatu, jiraattota miliyeena sadi ta'an qabdi.

   Sarrarri bishaan magaalattii dulloomurraa kan ka'e yaaddoo nageenyaa uumurraa kan ka'e suphuuf maallaqni barbaachisaa ture.

   Osoo bulchiinsi magalaattii maallaqa ittiin sarara bishaanii suphan osoo barbaaduu namni eenyummaansaa hin baramne kun warqee kg 21 kan dolaara miliyeena 3.6 ol baasu arjoome.

6. 20 Guraandhala 2026Jaalalleen duraanii Ronaaldoo akka maqaa isa balleessituuf maallaqni guddaan kennameefii diduu himte

   

   Madda suuraa, Getty Images

   Beekamtii guddaa seenaa guddaa addunyaa kubbaa miilaa keessatti qabuun ala Kiristaanoo Ronaaldoo, waa’ee jireenya jaalalaa isaan walqabsiisees yeroo baayyee mata-duree oduudha.

   Jaalalleewwan isaa duraaniifi ammaa, akkasumas ijoolleen isaas yeroo baayyee mata-duree oduudha.

   Ronaaldoon dhiyeenya kana jaalallee isaa yeroo dheeraafi haadha ijoolleessaa Jorjiinaa Rodiriigeez fuudhuuf akka jiru ifatti beeksiseera.

   Amma garuu maqaan isaa kann ka’eef waa’ee Jorjiinaa fuudhuuf jechuu isaa miti’ waan jaajalleen duraanii isaa jettedha.

   Jemaa Atkinsan jedhamti. Taatee Rondaaldoo waliin walqabtu icciitiin qabattee turte gadi baste.

   Kiristaanoo Ronaaldoo akkuma gara Maanchester Yunaayitid dhufeen Jemaa waliin jaala jalqabe. Jaalalli isaanii bara 2007 jalqabe garuu ji’a afur caalaa hin turre. Yeroo sanatti lachuu jaalalaan waliin turee ifa hin goone ture.

   Yeroo oduun Rondaaloo waliin gargar ba’uun dhaga’ametti, waa’ee Ronaaldoo maqaa xureessuufi hamaa ta’e akka dubbattuuf bakka garagaraatii maallaqni guddaan akka dhufeef dubbatti Jemaan.

   “Waa’ee Ronaaldoo wanta hamaa akkan dubbadhuuf maallaqni guddaan naaf dhiyaatee ture. Ani garuu hunda nan dide. Sababiin isaa ammoo waa’ee isaa waan hamaa kanan jedhu hin qabun ture.”

7. 20 Guraandhala 2026'Iraan waliigaltee akka fudhattuuf Tiraamp haleellaa murtaa'aa irratti gaggeessuuf yaadaa jira'

   

   Madda suuraa, Reuters

   Iraan marii Ameerikaa waliin taasisaa jirtu waliigalteerra akka geessuuf Pirezidant Tiraamp haleellaa qilleensaa murtaa’aa ta’e irratti gaggeessuu yaadaa akka jiru Wool Istiriit Joornaal gabaase.

   Barruun kun maddeen maqaan isaanii hin ibsamne eeruun akka gabaasetti, Tiraamp yaadaa jira, "haleellaan duraa guyyoota muraasa keessatti kan gaggeeffamu yoo ta'u, pirezidaantichi haata'u jennaan dhaabbileen waraanaafi mootummaamurtaa'an irratti xiyyeeffatama," jedhan.

   Maddeen kun Iraan sagantaa nukilaraa addaan kutuuf hayyamamtuu ta'uu baannaan, " Ameerikaan dhaabbileen mootummaa Iraan waliin hidhata qaban irratti haleellaa bal'aa akka gaggeessituufi kun ammoo duula mootummaa Iraan kuffisuuf taasifamu ta'a" jechuusaanii Wool Istiriit Joornaal gabaaseera.

8. 20 Guraandhala 2026Arsenaaliif Arteettaan deemee Faabirigaas dhufuufii?

   

   Madda suuraa, Getty Images

   Taphataan duraanii beekamaa Arsenaal Emaanu’el Petiit leenjisaan Arsenaal yeroo ammaa Mikeel Arteettaan kilabicha gadhiisee deemuu danda’a yaada jedhu kenne.

   Akka Petiit jedhutti, Arteettaan kilaba Awurooppaatti guddaa ta’e Baarseloonaa gara leenjisuu deemuu mala.

   Yoo Mikeel Arteettaan gadhiise ammoo taphataan duraanii Arsenaal yeroo ammaa kilaba Xaaliyaan Koomoo jedhamu leenjisuun maqaa gaarii horachaa jiru Seesk Faabirigaas bakka akka bu’us tilmaameera.

   Arteettaa Arsenaaliin kilaba guddaafi sodaatamaa gochuu danda’eera, garuu dheebuu waancaa kilabichaa wagga 2o olii furuu waan hin dandeneyeef deeggartoota biraa dhiibbaan itti dhufaa jira.

   Mikeel Arteettaa kilabichi akka wagga waggaan hirmaannaa Shaampiyoons Liigii Awurooppaa keessatti hirmaatu godheera.

   Piriimer Liigii keessattis sadarkaa gaarii qabatee akka itti fufu gochuu danda’eera.

   Arsenaal gadhiisnaan garuu Arteettaan garu hundee isaatti deebiyuun kilaba hidhata cimaa waliin qabu Baarseloonaatti akka deebiyu himeera.

   Arsenaal yeroosaa eegee 'sigigaachuu' jalqabe - haala kanaan dharraa waancaa waggaa 22 ba'uu danda'aa?

9. 20 Guraandhala 2026Hogganaa haaraa Hamaas filachuuf sagaleen kennamaa jira - Maddeen BBCtti himan

   

   Madda suuraa, Reuters

   Hamaas hogganaa bulchiinsa haaraa yeroo filachaa akka jiru qondaalii olaanaa Filisxeem garee hidhataa kanatti dhiyeenya qabu BBCtti hime.

   Gaazaa fi Weest Baank lafa Israa'eliin dhuunfatame keessatti miseensonni Hamaas filannoo geggeessaa jiru.

   Bu'aan filannoo kanaa warraaqsi dhaaba kanaa garam deema waan jedhu agarsiisa.

   Ameerikaafi biyyooti yeroo waraanaa gidduu seentummaan hojjechaa turan waa'ee bulchiinsa waraana boodaa, Gaazaa deebisanii ijaaruufi egeree humna hidhataa kanaa mariiyachaa jiru.

   Filannoon kuni hogganooti olaanoo Hamaas haleellaa Israa'el waggoota lamaan dura raawwatteen ajjeefamaniiru.

   Bara 2023 haleellaa Hamaas Israa'elitti raawwateen booda namoonni 1,200 yoo ajjeefaman, duula waraanaa ergasii Israa'el Gaazaatti banteen namoonni kuma 70 ol ajjeefamuu ministarri fayyaa Gaazaa Hamaasiin hogganamu ibseera.

   Namoonni Gaazaa keessaa dhoksaan sagalee kennaa jiru jedha maddi BBCtti dubbate. Haa tahu malee sagalee kennuun kuni xumuramuusaaf waan barame hin jiru.

   Yeroo bu'aan ibsamu hogganaan garichaa waggaa tokkoof aangoorra tura.

10. 20 Guraandhala 2026Interpooliin Afrikaa keessatti hanna gama onlaayinii raawwatamurratti tarkaanfii fudhachuu eegale

    

    Dhaabbanni poolisii idil-addunyaa Interpol akka beeksisetti, qaamoleen seera kabachiisan biyyoota Afrikaa 16 waliin ta'uun hanna doolaara miiliyoona 4.3 ol deebisuu danda'uu ibse.

    Kana malees, namoota gama onlaayiniitiin namoota gowwoomsuun yakka raawatan gara 651 to’annaa jala oolchuu, tarkaanfii kana kan itti fufu ta'uu ibseera.

    Ibsa tibbana baaseen Interpol akka jedhetti, opereshinii maqaa Operation Red Card 2.0 jedhamuun moggaafame kun torban saddeet kan fudhate ta'uu eerera.

    Biyyoota hojii kanarratti hirmaatan keessaa muraasni Angoolaa, Kaameeruun, Kootdivuwaar, Keeniyaa, Naayijeeriyaa fi Zimbaabuwee fa'i.

    Biyyoota kanaafi kaanitti shira neetworkiin yakkaa tgama oonlaayinii invastimantii bu’aa guddaa argamsiisuu jechuun namoota gowwomsuuf qopheessan heddu fashaleessuu isaa ibseera.

    Gareen hanna kun biyyoota addaa addaa keessatti waadaa sobaa isaaniin namoota dhuunfaa, dhaabbilee daldalaa fi hawaasa guutuu irratti miidhaa maallaqaa fi xiinsammuu guddaa geessisaa jiru," jedhan Niil Jeetoon, Daarektarri Yakka Interpol.

    Interpol odeeffannoo yeroo qabatamaa waljijjiiruu fi itti fayyadama meeshaalee fooransikii dijitaalaa irratti leenjii dabalatee odeeffannoo murtessaa biyyoota qooduun gumaacheera jedheera.

    Walumaatti, hojiin kun hanna kasaaraa doolaara miiliyoona 45 ol waliin walqabatee jiru kan saaxilu yoo ta’u, miidhamtoota gara 1000 kan irra caalaan isaanii Afrikaa irraa ta'uu dhabbataichi ibseera

11. 20 Guraandhala 2026UK'n Ameerikaan Iraan haleeluuf buufata waraanaa ishee akka fayyadamtu hin hayyamne

    

    Madda suuraa, Reuters

    Mootummaan Ingilizii Ameerikaan buufata waraanaa UKtti fayyadamuun akka Iraan irratti haleellaa raawwattuuf diduu ishee odeeffannoon BBC'n argate ifa godhe.

    Kana dura Ameerikaan ''RAF Fairford, Diyeegoo Garsiyaa kan odola Galaana Hindii keessatti argamutti fayyadamuun Baha Giddu Galeessaa keessatti haleellaa raawwachaa turte.

    Gaazexaan The Times akka gabaasetti, Pirezidaantiin Ameerikaa Doonaald Tiraamp waliigaltee dhiyeenya kana Sar Kar Istaamer Odola Chaagoos Moorisiyaaf kireessuun "dogongora guddaa" jechuun qeeqan.

    Tiraamp yoo mariin nukilaraa Iraan waliin taasiftu yoo hin milkoofne "Ameerikaan Diyeegoo Garsiyaa fayyadamuun barbaachisaa ta'uu mala" jechuun dubbatan.

    Tiraamp karoora UKn Odoola Chaagoos Moorisiyaaf dabarsitee kennuuf qabdu mormuun, “Diyeegoo Garsiyaa dabarsitanii hin kenninaa” jechuun meediyaa hawaasaa irratti maxxansan.

    UK'n odolawwan kana erga dabarsitee kennitee booda irra deebitee Ameerikaatti buufata waraanaaf kireeffachuuf karoorfattee jirti.

    Dhimma kana ilaalchisee yaada akka kennan kan gaafatamanii dubbi himaan mootummaa UK “Akkuma yeroo kaanii hunda dhimma oppireeshiinii waraanaa irratti yaada hin kenninu.”jechun himan

    Dubbi himaan kun “Ameerikaa fi Iraan gidduutti adeemsi siyaasaa yaalamaa jira, UKn kan deeggartu isa kana.”jedhan

    Itti dabaluunis ''Iraan gonkumaa boombii niwukilaraa hojjechuu danda'uu hin qabdu, nuti dursa kan kenninu nageenya naannichaatifi,'' jedhan.

12. 19 Guraandhala 2026Iraan waligalteerra gahuuf guyyaa 10 qabdi- Tiraamp

    

    Madda suuraa, Getty Images

    Doonaald Tiraamp Iraan guyyoota 10 dhufan keessatti waliigalteerra gahuu qabdi, ta'uu baannan tarkaanfii waraanaa akka fudhatu akeekkachiise.

    "Us Iraan wajjin waliigalteerra gahuuf ykn tarkaanfii waraanaa fudhachuuf guyyoota kudhan ittaanan addunyaan arguuf jira," jechuun dubbate Tiraamp.

    Tiraamp kana kan dubbate walgahii jalqabaa dhaabbata ofii hundeesse Boordii Nagaa Washingtanitti gaggeeffamerratti.

    US guyyoota dhiyoo as xayyaarotafi dooniwwan waraanaa dabalataa gara Baha Giddu Galeessatti geessuun humnashee cimsaa jirti.

    US humna dabalataa garas ergaa kan jirtu mariin dhimma nikularaa irratti USfi Iraan magaalaa Jeneevitti gaggeessan waliigaltee qabatamaarra osoo hin gahin xumuramuu hordofeeti.

    Miseensonni kongireesii dimokiraatotaafi rippaabilikaanotaa tokko tokko garuu kongiresiin osoo hin raggaasisin haleellaan kamuu Iraan irratti gaggeeffamuu akka hin qabne mormaa jiru.

    Gama kaanin ammoo Raashiyaan ibsa har'a baasteen US Iraan haleeluu irraa akka of qusattu jetteetti.

13. 19 Guraandhala 2026US ajajoota Humna Addaa Sudaan (RSF) irra qoqqobbii keesse

    

    Madda suuraa, AFP/Getty Images

    US qondaalota waraanaa Humna Addaa Sudaan (RSF) irra qoqqobbii keesse.

    Qondaalota waraanaa qoqqobbii irra keesse kunneen waraana waliinii Sudaanitti gaggeeffamaa jiru keessatti RSF magaalaa al-Fashir ji'oota 18 kan ta'uu marsee ugguree yeroo turetti itti yaadanii ajjeechaa gaggeessaa turan jechuun ta'uu Rooyitars gabaase.

    Akka gabaasa kanaatti kanneen qoqqobbiin irra kaa'ame qondaalota waraanaa olaanoo sadiidha.

    US akka ibsitetti, RSF magaalaa al-Fashaar ji'oota hedduuf marsee ugguruu qofa osoo hin taane, yeroo waraana Sudaan harkaa fudhatu magaalattii keessatti "ajjeechaa sanyiirratti xiyyeeffate, hiraarsuu, beelessuu, fi haleellaa saalaa raawwataa turan" jechuun qoqqobbii kan irra keesse.

    RSF magaalaa al-Fashaar Onkoloolessa 2025 kan to'ate yoo ta'u, yeroo magaalattii to'atu ajjeechaa jumlaa heddu raawwachuun himatamaa ture.

    Ajajaan waliigalaa RSF Jeneraal Hamdaan Dagaaloo kanneen US qoqqobbii irra keesse keessa hin jiru.

14. 19 Guraandhala 2026Xiyyaaronni waraanaa Ameerikaa jaha gara Baha Jiddu-galeessaa yoo dabran mul'atan

    

    Madda suuraa, Flightradar24

    Yoo xiqqaate xiyyaaronni waraanaa US jaha kamisa ganama yoo gara Baha Jiddu-galeessaa balali'an mul'achuu balallii hordofuun kan beekamu Flightradar24 irratti mul'ate.

    Isaan kunneen jettiiwwan basaasaa E-3 kan jedhaman lama, xiyyaarota geejjibaa C-17 jedhaman lamaafi xiyyaara boba'aa KC-135 tokkoo fi kan haleellaa HC-130 Combat King II lama dha.

    E-3, jettiiwwan lolaa kan hordofanii fi to'atan akkasumas balaa diinaa kan hordofan gara Awurooppaa fi Baha Jiddugaleessaa imalaa jiru.

    Awurooppaa irraa jeettiiwwan geejjibaa buufataalee isaanii irraa ka'anii gara baha Meediteraaniyaanii qajeelan.

    Ragaan Flightradar24 akka agarsiisutti HC-130J lama - keessummaa kanneen xiyyaara waraanaa duraanii C-130 irraa modeelli isaanii fooyya'an Itaalii- Neeppils irraa gara buufata waraanaa al-Udeid kan Qaataar jiruu balali'an.

15. 19 Guraandhala 2026Tiraamp deeggarsa Gaazaaf dolaarri biliyeena 8 ol walitti qabamuu ibse

    

    Madda suuraa, Reuters

    Biyyoonni michoota US ta'an deeggarsa Gaazaaf dolaara biliyeena 8 waliitti qabuu Donaald Tiraamp beeksise.

    Tiraamp kana kan beeksise walgahii jalqabaa Boordii Nagaa inni hundeesse walitti qabame irratti.

    Biyyoonni miseensa Boordii Nagaa ta'an wal-gahii jalqabaa boordichaarratti kan argaman yoo ta'u, wal-gahii kanaan biyyoonni michuu US ta'an deeggarsa Gaazaaf kan oolu dolaara biliyeena 8 ol arjoomaniiru jechuusaa maddi oduu Rooyitars gabaase.

    Boordiin Nagaa Tiraamp ji'a darbe keessa Fooramii Diinagdee Daavositti gaggeeffamerratti ifatti hundeesse jalqaba waraana Gaazatti gaggeeffamaa turetti furmaata godhuuf kan hundeeffame ta'us, amma dhaabbata idiladdunyaa ta'ee akka hojjata jedhamee jira.

    Inumaayyuu Boordiin Nagaa kun Dhaabbata Biyyoota Gamtoomanii bakka bu'a jedhamee sodaatama.

16. 19 Guraandhala 2026Xiyyaaronni waraanaa murteessoon Ameerikaa gara Baha Jiddu-galeessaa bobbaafamuun mirkanaaye

    

    Madda suuraa, EPA:Getty image

    Mariin Ameerikaa fi Iraan jidduu bu'aa buusuu dhabuu hordofee ittaanee Ameerikaan tarkaanfii waraanaa fudhachuu dandeessi jedhamee sodaatamaa jira.

    Waayit Haawus har'a akka beeksisetti Iraan daftee waliigaltee yoo hin raawwanne Teehraan irratti filmaata tarkaanfii waraanaa fudhatamuu danda'an Pireezdaant Tiraampiif dhiyaatanii irratti mari'ataman.

    Kun guyyoota itti aanan jijiiramoonni jiraachuu akka malan akeeke.

    Ameerikaan tarkaanfii waraanaa dhaadachiifii jirtuuf torbaanotaaf qophii gochuuf dooniiwwan guguddoo xiyyaarota waraanaa baatanii fi xiyyaarota kaan gara Baha Jiddu-galeessaa bobbaafte.

    BBC Verify akka mirkaneeffatetti Jeettiiwwan lolaa murteessoo ta'an gara galoo galaana qajeeluu mirkaneeffateera.

    Xiyyaaronni kunneen kan akkamii akka ta'an Madda odeeffannooo Jeensitti xiinxalaan balallii Saam Waayiz BBC'f himan.

    Haaluma kanaan gara galoo galaana Faars kan qajeelan xiyyaaronni lolaa US:

    • Xayyaarota waraanaa F-35 - Kunneen "haleellaa jalqabaatiin iddoowwan xiyyeeffannoowwan jajjaboo ta'an rukutuuf oola".

    • Xayyaarota waraanaa F-22- “Idileen gara Bhaha jiddu galeessaa kan bobbaafaman, baay'inni isaanii xiqqaa fi qaalii dha".

    • KC-135 fi KC-46 – Xayyaarota boba'aa fe'an sochii balallii dheeraa xiyyaarota kaanii tumsuuf, ammaaf lakkoofsa olaanaan bobbaafaman, Riijinichatti baay'ina olaanaan agartu".

    • E-3 – Xiyyaarota ajajaa fi basaasaaf oolan. US "oppireeshinii qilleensaa babala'aa raawwachuu fi to'annoof itti fayyadamti".

    "Bobbiin kun kan addaati" jedhe Waayiz BBC Verify'tti yoo dubbatu: “Oppireeshinii qilleensarraa babal'aa gaggeessuuf kan dandeessisu ta'uu ifatti akeeka."

17. 19 Guraandhala 2026Poolisiin Islaamummaa Naayijeeriyaa musliimota Ramadaana hin soomne jedhuun sagal hidhe

    

    Madda suuraa, Sani Maikatanga

    Kutaa bulchiinsa Kaanoo kan kaaba Naayijeeriyaa jirtutti Poolisiin Islaamummaa musliimota guyyaa sooma Ramadaanaa nyaatan sagal to'ate.

    Irra caalaan jiraattotaa musliima kan ta'an bulchiinsa Kaanoo keessatti seerri Shari'aa if seerri idilee waluma cinaa hojiirra oola.

    Poolisiin Islaamummaa "Hisbaa" jedhamu waggaa waggaan namuu sa'aatii soomanaa kabajaa jiraachuu mirkaneessuuf, "kaaffewwan, manneen nyaataa fi gabaa" ni sakkatta'a. Dhaabbileen murtaa'an kutaalee kiristaanonni baay'inaan keessa jiraatan banaa ta'u.

    Ajajaa itti aanaan Poolisii Islaamummaa Mujaahid Amiinuudiin, kanneen to'ataman dhiirota torbaa fi dubartoora lama ta'uu BBC'tti himan. Kanneen soomni jalqbaamuu waan hin beekne fakkeessan jedhan.

    Ajajaan kun "Hiineerra, nu bira jiru. barbaachisummaa soomaa, akkamitti akka kadhatamu, Quraana akka dubbisanii fi musliimota fakkeenyummaa qaban akka ta'an barsiifna" jedhan.

    Yoom akka gadhiisuf jiran hin himne. Asiin poolisiin dura namoota bifa wal fakkaataan kan hidhe maatiidhaan walqunnamsiisee, erga hiikamanii hanga soomni hiikkamu soomuu isaanii akka hordofan hubachiisaa ture.

    Kutaalee bulchiinsaa 12 kaaba Naayijeeriyaa musliimonni heddummatanitti seerri Shari'aa fi seerri idilee wal maddii hojiirra akka oolu waggoota 20 dura tumame.

    Akka lakkoofsa amantaa Islaamummaatti ji'a 9ffaa kan ta'e baatiin Ramadaanaa musliimota biratti ulfina guddaa qaba.

    Musliimonni, ji'a boqonnaawwan jalqabaa Quraana qulqulluu Nabiyyuu Mohammadiif itti bu'e jedhanii amanu.

    Naayijeeriyaatti ji'i sooma Ramadaanaa Roobiuiu kaleesssaa Guraandhala, 18, 2026 eegale, Ebla 12 ykn 13 soomni hiikkata jedhamee eegama.

18. 19 Guraandhala 2026Naannoo Gambeellaatti poolisoonni leenjii haaromsaarratti "waliin dhahan" jedhaman 48 mana-murtiitti dhiyaatan

    

    Madda suuraa, Gambella Press Secretariat

    Naannoo Gambeellaatti miseensonni poolisoonni leenjii haaromsaarratti "waliin dhahan" jedhaman 48 mana-murtiitti dhiyaatan.

    Walitti bu'insa dhiyeenya kana naannoo Gambeellaatti mudate hordofee leenjii haaromsaa miseensota hundaaf kennaa kan jiru Komishiniin Poolisii naannichaa, yeroo gamagammiitti waliin dhahaniiru jedhaman 28 hidhaa cimaa waggaa tokkoofi walakkaa akka itti murtaa'e beeksiseera.

    Miseensonni poolisii biroo 20 ammoo dhimmi isaanii mana-murtii idileen ilaalamaa jiraachuun ibsameera.

    Sadaasa darbe ajajaan poolisii magaalaa Gambeellaa ajjeefamuu hordofee magaalaa Gambeellaa, aanaa addaa Itaang fi aanaa Abool keessatti walitti bu'iins torbanootaaf ture uumamee ture.

    Walitti bu'iinsa lubbuu namootaa balleesseefi qabeenya mancaase kana hordofee, mootummaan naannichaa poolisoonniifi miseensonni kora bittinneessaa meeshaa waraanaa harka isaanii jiru akka deebisan ajajeera.

    Miseensota sababa hayyamaan, dhukkubaan, akkasumas dahumsaan hojiirra hin turre dabalatee qaamoleen nageenyaa naannichaa hundi leenjii haaromsaa akka fudhatan godheera.

    Sababa " leenjii haaromsaa kanaan" poolisoonni idileefi kora bittineessaa hundi leenjiifa gara wiirtuu leenjii ajaja Daalol akka galan taasifamuu poolisiin naannichaa ibsa baaseen beeksiseera.

    Haata'u malee, yeroo leenjii kanatti, gocha "waliin dhahuu" miseensonni poolisii raawwatan jiraachuu isaanii komishiniin poolisii naannichaa ibseera.

    Kanaan walqabatees miseensonni poolisii toa'ataman 48 gocha raawwatan jedhanis ibsa baaseen himeera.

    Wareen to'annoo jala oolfaman keessaa "hojii isaanii ofiin dhiisanii warra bahan," akkasuma sababa naamusaafi yakka garagaraan itti murtaa'uun miseensummaa keessaa" warri gaggeeffaman keessatti argamu.

19. 19 Guraandhala 2026Gabaasni Haaraan lammiileen Keeniyaa waraana Raashiyaaf galmaahan 1,000 ta'uu ibse

    

    Madda suuraa, Ukraine Defence Intelligence

    Walumaagalatti lammiileen Keeniyaa waraana Raashiyaatti makamuuf galmaahan 1,000 akka gahan qorannoon tikaa Keeniyaa tokko ibse.

    Gabaasni tika Keeniyaa Roobii darbe Paarlaamaa biyyattiif dhiyaate hanga ji'a kanaatti lammiileen Keeniyaa 89 adda waraanaa jiraachuu ibseera.

    Hogganaan miseensa Paarlaamaa Kimaanii Inchunwaa Kimaanii miseensota Paarlaamaaf gabaasicha yoo dhiyeessu gabaasa akkaan jeequ jedheen hojjettootni mootummaa Raashiyaa lammiilee Keeniyaa kana geejibuu keessaa qooda qabu jedheera.

    Qaamolee lammiilee kana qacaranii fudhatanii deeman hojjettoota buufata xiyyaaraa Keeniyaa, waajira Immigireeshinii fi Daayirektoreeti qorannoo yakkaa waliin hariiroo uumuus saaxileera.

    Hojjettootni Embasii Raashiyaa Keeniyaa jiruufi embasii Keeniyaa Raashiyaa jiruu qooda qabaachuus himaniiru.

    Embasiin Raashiyaa Keeniyaatti argamu ibsa Kamisa baaseen gabaasichi ''hamaa fi dogoggorsaadha'' jechuun hojjettootnisaa qooda akka hin qabne ibse.

    Gabaasa hanga ammaa jiruun lammiin Keeniyaa tokko du'uu gabaasaaleen ibsaniiru.

20. 19 Guraandhala 2026Ilmi Mugaabee Afrikaa Kibbaatti 'dhukaasa banee' to'atame

    

    Madda suuraa, Anadolu Agency via Getty Images

    Ilmi Pirezidantii duraanii Zimbaabiwee Roobert Mugaabee inni xiqqaan Afrikaa Kibbaa magaalaa Johaanisbarg keessatti dhukaasa banuun to'atamuu Poolisiin beeksise.

    Dargaggeessi ganna digdamoota keessa jiruu Beelaarmaayin Mugaabee bakka daldalaa keessatti dhukaasa bane jedhameen namni ganna 23 balbala eegu akka malee miidhamee Hospitaala galeera jedhameera.

    Poolisiin bakka ilmi Mugaabee kun jirurraa meeshaa dhukaasni itti baname barbaadaa jira.

    Poolisiin ragaa argannaan yaalii ajjeechaan himachuuf deema.

    Beelaarmaayin ilma dhumaa Mugaabeen haadhawarraasaanii lammataa Girees Mugaabeerraa argataniidha.

    Mugaabeen waggoota 37f Zimbaabiwee erga bulchanii booda ganna 93tti bara 2017 boqotan.