مناء رانا

پاکستان نے حالیہ سیریز میں بھارت پر ایک کے مقابلے دو میچ سے برتری حاصل کر لی ہے۔

پشاور کے لالہ ایوب سٹیڈیم میں ہونے والے اس میچ کو دیکھنے تقریباّ بیس ہزار تماشائی موجود تھے۔سٹیڈیم میں تماشائیوں کا داخلہ مفت ہونے کے سبب تماشائی سٹیڈیم کی گنجائش سے زیادہ تھے۔ پاکستان نے اپنا پہلا گول میچ کے پندرویں منٹ میں کیا۔ یہ فیلڈ گول تھا جو کہ مدثر علی خان نے کاشف جواد کے خوبصورت پاس پر کیا۔

پاکستان کی ہاکی ٹیم کا دوسرا گول بھی فیلڈ گول تھا جو کہ شبیر احمد کی زبردست موو پر شکیل عباسی نے میچ کے پچسیویں منٹ میں کیا۔

میچ کا وقفہ ہونے تک پاکستان کی ٹیم نے دو گول کیے تھے جبکہ بھارت کی ٹیم کا سکور صفر تھا۔

پہلے ہاف میں پاکستان کو صرف ایک پینیلٹی کارنر ملا جبکہ بھارت کی ٹیم تین پینلٹی کارنر حاصل کرنے میں کامیاب ہوئی لیکن کسی سے بھی فائدہ نہ اٹھا سکی۔تیسرے پینلٹی کارنر پر بھارت کا کھلاڑی بال گول پوسٹ میں پھینکنے میں کامیاب تو ہوا تاہم اس کی ہٹ خطرناک ہونے کے سبب گول تسلیم نہیں کیا گیا۔

میچ کا وقفہ ہونے تک پاکستان صفر کے مقابلے دو گول سے آگے تھا۔

دوسرے ہاف کے شروع ہوتے ہی بھارت نے پاکستان کے گول پر حملے شروع کر دیے اور پہلے ہی منٹ میں پینیلٹی کارنر حاصل کر لیا تاہم وہ اس پر گول نہ کر سکے۔
بھارتی کھلاڑیوں نے کوششیں جاری رکھیں اور اپنا پہلا میچ کے اڑھتالیسویں منٹ میں کرنے میں کامیاب ہوئے یہ فیلڈ گول ہری پرشاد نے تشار کانڈیکر کی زبردست موو پر کیا۔

بھارت کے کھلاڑی ارجن ہلپا نے میچ کے اکاسٹھویں منٹ میں ایک اور فیلڈ گول کر کے پاکستان کی برتری ختم کر دی۔

اس موقع پر میچ میں خاصی تیزی آ گئی اور دونوں ٹیموں نے فیصلہ کن گول کے لیے خوب زور لگایا۔اسی کشمکش میں پاکستان کی ٹیم دوسرے ہاف کا دوسرا اور پینیلٹی کارنر حاصل کرنے میں کامیاب ہوئی اور اس بار سہیل عباس نے کوئی غلطی نہیں کی اور بال گول پوسٹ میں پھینک کر تیسرا گول کر دیا اور پاکستان کو ایک گول کی برتری دلا دی اور یوں پاکستان یہ میچ جیتنے میں کامیاب ہوا۔

تاہم مبصرین کے بقول بھارت کی نئی اور ناتجربہ کار ٹیم نے آج بھی کوئٹہ والے میچ کی طرح بہترین کھیل پیش کیا اور خاص تور پر دوسرے ہاف میں آج بھی پاکستان کے دفاع کو توڑنے میں کامیاب ہوتی رہی لیکن بد قسمتی سے میچ کا نتیجہ ان کے حق میں نہ ہوسکا۔

پاکستان نے حالیہ سیریز میں بھارت پر ایک کے مقابلے دو میچ سے برتری حاصل کر لی ہے۔