 |  بھارتی ٹیم کے کپتان سورو گانگولی |
بھارتی کرکٹ ٹیم کے کپتان سورو گنگولی نے اعلان کیا ہے کہ وہ پاک بھارت ٹیسٹ سیریز کے سلسلے میں اتوار کو ملتان میں کھیلے جانے والے پہلے ٹیسٹ میچ میں حصہ نہیں لے رہے۔ گنگولی نے صحافیوں سے بات چیت کرتے ہوئے کہا کہ انہوں نے یہ فیصلہ کمر میں چوٹ کی بنا پر کیا ہے۔ بدھ کو ایک روزہ سیریز کے پانچویں میچ کے دوران گنگولی کو سٹریچر پر ڈال کر گراؤنڈ سے باہر لے جایا گیا تھا۔ بھارت نے یہ میچ جیت کر پاکستان کو ون ڈے سیریز میں دو کے مقابلے میں تین میچوں سے شکست دی تھی۔ بدھ کے میچ کے دوران انضمام الحق کے ایک عمدہ سٹروک روکنے کے لئے جب گنگولی نے چھلانگ لگائی تو ان کی کمر میں سخت درد اٹھا تھا۔ |  پانچویں ون ڈے کے دوران گنگولی زمین پر لیٹے ہیں |
انہوں نے سنیچر کو اس امید کا اظہار کیا کہ علاج کے باعث وہ دوسرے ٹیسٹ سے پہلے پوری طرح صحت یاب ہو جائیں گے۔ دوسرا ٹیسٹ میچ پانچ اپریل سے لاہور میں شروع ہو رہا ہے۔ بھارت کے مایہ ناز بلے باز راہول ڈراوڈ نے اب تک صرف دو ٹیسٹ میچوں میں ٹیم کی کپتانی کے فرائض انجام دیئے ہیں۔ یہ دونوں میچ بھارت کے شہر موہالی میں نیوزی لینڈ کے خلاف کھیلے گئے تھے۔ گنگولی کی ٹیم میں عدم شمولیت بھارت کے لئے ایک دھچکے سے کم نہیں ہے۔ اطلاعات کے مطابق گنگولی کو ہڈی میں چوٹ نہیں آئی ہے۔ بھارتی ٹیم کے منیجر کے مطابق گنگولی کی سکین رپورٹ سے پتہ چلا ہے کہ گنگولی کا پٹھا کھچ گیا ہے۔ | 
یہ صفحہ دوست کو ای میل کیجیئے
پرِنٹ کریں
