 |  اورکٹ کو منشیات فروشوں نے اپنے مقاصد کے لیے استعمال کیا |
برازیل میں حکام نے دس افراد کو گوگل کی آن لائن کمیونٹی سائٹ ’اورکٹ‘ کو منشیات بیچنے کے لیے استعمال کرنے کےجرم میں گرفتار کیا ہے۔ اس گروہ کا اس وقت پتہ چلا جب پولیس نے اس کی ٹیلی فون کالز کو ریکارڈ کیا اور اس ویب سائٹ کےذریعےاس گروہ کے ایک دوسرے کو بھیجےگئے آن لائن پیغامات کومانیڑ کیا۔ ’اورکٹ‘ نامی یہ ویب سائٹ لاطینی امریکہ میں بہت مقبول ہے۔ اس ویب سائٹ کومختلف کمیونٹیاں آن لائن رابطوں کے لیے استعمال کرتی ہیں۔ اخباری اطلاعات کے مطابق اس ویب سائٹ کے ستر لاکھ ممبروں میں آدھے سے زیادہ کا تعلق برازیل سے ہے۔ ڈرگز اینفورسمنٹ سروسز کے ایک آفیسر نے بتایا کہ ہم نےاس گروہ کا سب سے پہلے پتہ ٹیلی فون کالز ٹیپ کر کے چلایا۔ اس کے بعد تحقیق کا دائرہ کار بڑھاتے ہوئے انٹرنیٹ پراس گروہ کی سرگرمیوں کو مانیٹر کیا۔ گوگل کا اس حوالے سے کہنا ہے وہ اس معاملے سے واقف ہے اور اس بارے میں تحقیق کر رہی ہے۔ گوگل نےدو ہزار چار میں اورکٹ نامی اس ویب سائٹ کا آغاز کیا تھا۔ برازیل کے حکام کا اس بارے میں کہنا ہے کہ منشیات کے ڈیلر نےآپس میں رابطوں اورمنشیات کی فروخت کے لیےاورکٹ نیٹ ورک سروسز کواستعمال کیا۔ آن لائن کمیونٹی کی اس ویب سائٹ کو ایک ترکش سوفٹ وئیر انجینئر اورکٹ بویوکوٹین نے بنایاتھا۔
| 
یہ صفحہ دوست کو ای میل کیجیئے
پرِنٹ کریں
