چرچ کی جانب سے الزام لگنے کے بعد گلیلیو اپنی باقی تمام زندگی فلورنس کے باہر اپنے گھر میں نظر بند رہے

آج سے چار سو برس پہلے گیلیلیو نے دور بین کی مدد سے فلکی مشاہدے شروع کیے تھے جس کی یاد میں ایک تقریب سے خطاب کرتے ہوئے پوپ بینیڈکٹ نے ماہرِ فلکیات کی تحسین کی۔

انہوں نے کہا کہ قوانینِ فطرت کو سمجھنے سے کائنات میں بکھری ہوئی قدرت خداوندی کی تعریف و توصیف کو جی چاہ سکتا ہے۔

انیس سو بانوے میں پوپ جان پال نے کہا تھا کہ کیتھولک چرچ کی جانب سے گیلیلیو کی مذمت کا عمل ایک المناک غلطی تھی۔

گیلیلیو نے اپنے سائنسی طریقے استعمال کرتے ہوئے یہ کہا تھا کہ زمین سورج کے گرد گھومتی ہے نہ کہ سورج زمین کے گرد چکر لگاتا ہے۔

ماہرِ فلکیات کے خیالات چرچ کے نظریات سے براہِ راست متصادم تھے کیونکہ کلیسا کا یہ عقیدہ تھا کہ زمین ساکن ہے اور زمین ہی مرکزِ کائنات ہے۔

چنانچہ ہوا یہ کہ گلیلیو کو سنہ 1633 میں بدعت کا مرتکب ٹھہرایا گیا اور مجبور کیا گیا کہ وہ سرِ عام اپنے سائنسی نظریات میں غلطی کا اعتراف کریں۔

اس کے بعد گلیلیو اپنی باقی تمام زندگی فلورنس کے باہر پہاڑی علاقے میں اپنے گھر میں نظر بند رہے۔