حماس نے حملے کی تعریف کی لیکن اس کی ذمہ داری قبول نہیں کی

یروشلم میں حملہ

اسرائیل میں ایمرجنسی سروس کے کارکنوں کا کہنا ہے کہ مسلح افراد کی طرف سے کیے جانے والے اس حملے میں تقریباً تیس لوگ زخمی بھی ہوئے ہیں۔ مدرسے میں طالب علموں کی عمر اٹھارہ سے تیس برس کی بیچ ہے۔

عینی شاہدین کے مطابق مسلح شخص نے کتب خانے میں داخل ہو کر فائرنگ کر دی جہاں تدریس کا سلسلہ جاری تھا۔

اس مدرسے کے بارے میں بتایا گیا ہے کہ اس کا تعلق غرب اردن میں یہودیوں کو بسانے کی تحریک سے ہے جن کا نظریہ ہے کہ غرب اردن یہودیوں کے پاس ہونا چاہیے نہ کہ فلسطینیوں کے۔

واضح رہے کہ گزشتہ سالوں میں یہ اپنی نوعیت کا بد ترین حملہ ہے۔ سن دو ہزار سات میں یروشلم کے اندر ایک بھی حملہ نہیں ہوا تھا۔

فلسطینی تنظیم حماس نے حملے کی تعریف کی اور اسے دلیرانہ اقدام قرار دیا، تاہم اس نے اس کی ذمہ داری قبول نہیں کی۔

حماس نے کہا کہ وہ پہلے ہی غزہ میں اسرائیلی کارروائیوں کے خلاف پائے جانے والے غصے کے بارے میں متنبہ کر چکی ہے۔ امریکہ صدر جارج بُش، اقوام متحدہ کے سیکرٹری جنرل بان کی مون اور فلسطینی انتظامیہ کے صدر محمود عباس نے اس حملے کی مذت کی ہے۔

بی بی سی کے نامہ نگار کرسپن تھورلڈ کا کہنا ہے کہ اسرائیلی عوام اور دنیا بھر میں یہودیوں کے لیے یہ ایک پریشان کن واقعہ ہے۔ انہوں نے کہا کہ اسرائئل اس کے جواب میں کارروائی کر سکتا ہے۔

گزشتہ ہفتے اسرائیلی فوج نے شمالی غزہ میں کارروائی کی تھی جس میں متعدد شہریوں سمیت ایک سو بیس سے زیادہ فلسطینی ہلاک ہو گئے تھے۔ اسرائیل کا کہنا ہے کہ ایسی کارروائیوں کا مقصد فسلطینیوں کی طرف سے راکٹوں کے حملوں کو روکنا ہے۔