ڈیوڈ لوئین بی بی سی نیوز، قندھار

	طالبان کے ساتھ مفاہمت صرف افغان ہی کر سکتے ہیں: خالد

اسد اللہ خالد نے بی بی سی سے بات کرتے ہوئے کہا کہ دو یورپی ماہرین کو اس لیے ملک سے نکالاگیا کیونکہ وہ غلط طریقے سے طالبان کے ساتھ بات چیت کر رہے تھے۔

دو یورپی سفارتکاروں کو پچھلے سال اس وقت افغانستان سے نکل جانے کو کہا گیا تھا جب یہ معلوم ہوا کہ وہ مبینہ طور پر برطانیہ کی طرف سے چند طالبان کمانڈروں کے ساتھ معاملات طے کر رہے تھے۔

اسد اللہ خالد کا کہنا ہے کہ’وہ دو یورپی غلطی پر تھے۔ طالبان کے ساتھ مفاہمت کا طریقہ ڈھونڈنا ضروری ہے لیکن ایسا صرف افغان ہی کر سکتے ہیں۔ہم مفاہمت کی بات کر رہے ہیں نہ کہ دہشت گردوں کو اور زیادہ طاقتور بنانے کی‘۔

انہوں نے یہ بھی کہا کہ اگرچہ قندھار میں پچھلے تین دنوں میں تین خودکش حملے ہوئے ہیں تاہم طالبان کے خلاف جنگ میں کامیابی ہو رہی ہے۔

واضح رہے کہ برطانیہ اور افغانستان کے تعلقات خراب ہونے کی ایک وجہ یورپی ماہرین کا ملک سے نکالا جانا ہے اور اسی لیے صدر حامد کرزئی نے افغانستان میں اقوام متحدہ کے لیے برطانوی پیڈی ایش ڈاؤن کی تقرری مسترد کر دی تھی۔