ہیلری کلِنٹن انتخابی مہم میں باراک اوبامہ سے آگے ہیں

باراک اوبامہ اور سابق صدر کی اہلیہ ہیلری کلنٹن ڈیموکریٹِک پارٹی کی جانب سے امریکہ کے صدارتی امیدوار کی نامزدگی کے لیے انتخابی مہم میں ہیں۔

سینیٹر اوبامہ نے کہا کہ بِل کلنٹن اپنی اہلیہ کی انتخابی مہم کے دوران ان کی حمایت کے لیے ایک ’پریشان کن‘ حد تک آگے جا چکے ہیں۔ باراک اوبامہ نے کہا کہ مستقبل میں اگر ضرورت پیش آئی تو ان کی انتخابی مہم سابق صدر کو براہ راست جواب دے گی۔

حال میں ہیلری کلنٹن دو ریاستوں میں باراک اوبامہ کو شکست دے چکی ہیں۔ سینیٹر اوبامہ کا بیان ساؤتھ کیرولائنا میں ہونے والی ووٹنگ سے چند دن قبل آیا ہے۔ اوبامہ کو ڈیموکریٹِک پارٹی کی جانب سے صدارتی امیدوار کی حیثیت سے نامزدگی کے لیے اپنی انتخابی مہم میں جان ڈالنے کی اس وقت اشد ضرورت ہے۔

امریکی امور سے متعلق بی بی سی کے نامہ نگار کا کہنا ہے کہ ہیلری اور اوبامہ کی ایک دوسرے کی ناپسندیدگی میں روز بروز اضافہ ہوتا جارہا ہے۔

ہیلری کلِنٹن کی انتخابی مہم میں ان کے شوہر اور سابق امریکی صدر بِل کلِنٹن آگے آگے ہیں۔ سابق صدر نے اوبامہ پر ذاتی تنقید کرتے ہوئے کہا تھا کہ جنگِ عراق کی ان کی مخالفت صرف پریوں کی ایک کہانی تھی۔

بِل کلِنٹن کے بیان پر باراک اوبامہ نے شدید ردعمل کا اظہار کیا ہے۔ ذرائع ابلاغ کو دیے جانے والے ایک انٹرویو میں انہوں نے اس شدت سے ردعمل ظاہر کیا ہے جو کہ ان کا معمول نہیں ہے۔

انٹرویو میں باراک اوبامہ نے کہا ہے کہ سابق صدر اپنی اہلیہ کی انتخابی حمایت کے لیے ایسے بیانات دے رہے ہیں جن کا حقیقت سے کوئی واسطہ نہیں ہے۔