پیرس کانفرنس پچھلے ماہ اناپلیز میں ہونے والی مشرق وسطیٰ کانفرنس کی ایک کڑی ہے

فلسطینیوں کے لیے امداد کا وعدہ اڑسٹھ ممالک اور تنظیموں کی طرف سے گزشتہ ایک دہائی کے سب سے بڑے اجلاس میں کیا گیا۔ امداد کا مقصد ایک مستحکم فلسطینی ریاست کا قیام ممکن بنانا ہے۔ محمود عباس کی مخالف تنظیم حماس نے اس امدادی پیکچ کو مسترد کر دیا ہے۔

حماس کو اس اجلاس میں شرکت کی دعوت نہیں دی گئی تھی اور اس نے اس فیصلے کو اپنے خلاف اعلان جنگ قرار دیا تھا۔

بی بی سی کے مشرق وسطیٰ میں مدیر جیرمی براؤن نے کہا کہ اجلاس میں دو موضوعات چھائے رہے جن میں سے ایک فلسطینی انتظامیہ کے ہاتھ مضبوط
کرنا تھا اور دوسرا اسرائیل کی طرف سے فلسطینیوں کی زندگی میں بہتری لانے کی ضرورت پر زور۔

پیرس کی ایک روزہ کانفرنس گزشتہ ماہ اناپلیز (میری لینڈ) میں امریکہ کی طرف سے کرائی جانے والی مشرقِ وسطیٰ کانفرنس کی کڑی ہے۔ اناپلیز میں اسرائیلی وزیراعظم ایہود اولمرت اور فلسطینی صدر محمود عباس نے سال دو ہزار آٹھ کے اختتام سے پہلے امن معاہدہ کرنے کا عہد کیا تھا۔