برما کے واقعات پر عالمی سطح پر تشویش پائی جاتی ہے

امریکی افسران کے مطابق شاری ولا روز برما کے کئی رہنماؤں سے ملاقات کر کے وہاں ہونے والے حالیہ مظاہروں کے خلاف فوج کی خوں ریز کارروائی پر تشویش کا اظہار کریں گی۔

آج اقوامِ متحدہ کے ایلچی ابراھیم گمباری اقوامِ متحدہ کو برما کے اعٰلی فوجی اہلکاروں کے ساتھ اپنی بات چیت کی تفصیلات بتائیں گے۔

اس کارروائی میں ہونے والی ہلاکتوں پرعالمی سطح پر شدید تشویش پائی جاتی ہے جس میں کم از کم دس افراد ہلاک ہوئے تھے۔

سفارت کاروں کو اندیشہ ہے کہ اس کارروائی میں ہلاک ہونے والوں کی تعداد کہیں زیادہ ہے اور ہزاروں مظاہرین قید میں ہیں۔

امریکی وزیرخارجہ کے ترجمان شان مکامک کا کہنا ہے کہ محترمہ ولا روز برما کی قیادت کو ’واضح پیغام دیں گی‘ کہ وہ یہ کارروائیاں بند کرے اور اپوزیشن پارٹیوں کے ساتھ مذاکرات شروع کرے۔

ابھی یہ واضح نہیں ہے کہ ان کی ملاقات کن رہنماؤں سے ہوگی اور فوجی قیادت ، جس نے انہیں مدعو کیا ہے ان سے کس موضوع پر بات کرنے والی ہے۔