 |  پوپ کے آخری دیدار کے لیے لاکھوں لوگوں کی روم آمد متوقع ہے |
کیتھولک فرقے کے روحانی پیشوا پاپائے روم جان پال دوئم کی میت کو دیدار عام کے لیے پیر کو ویٹیکن کے سینٹ پیٹرز بیسلیکا میں لے جایا جائے گا۔ پوپ جان پال کو خراج عقیدت پیش کرنے اور ان کی آخری رسومات میں شرکت کرنے کے لیے بیس لاکھ لوگوں کی روم آمد متوقع ہے اور روم میں حکام ان لوگوں کی آمد پر شہر میں بنیادی سہولیات مہیا کرنے کی تیاریاں کر رہے ہیں۔ روم میں موجود بی بی سی کے ایک نامہ نگار کے مطابق شہر کے تمام ہوٹلوں اور مہمان خانوں میں کوئی کمرہ خالی نہیں ہے اور اب کھیلوں کے میدانوں میں عارضی طور پر لوگوں کے رات بسر کرنے کے انتظامات کیے جا رہے ہیں۔
|  پوپ کو دنیا بھر میں خراج عقیدپ پیش کیا جارہا ہے |
اس کے علاوہ حکام شہر میں ٹی وی کی بڑی بڑی سکرینیں لگانے پر بھی غور کر رہے ہیں تاکہ جو لوگ قریب نہ پہنچ پائیں وہ دور ہی سے پوپ کی آخری رسومات کو دیکھ سکیں۔دریں اثنا پوپ کی وفات کے بعد رومن کتھولک فرقے کے کارڈینلز کا پہلا اجلاس پیر کو ہو رہا ہے جس میں پوپ کی تدفین کی تاریخ طے کی جائے گی اور اس کے لیے انتظامات کو آخری شکل دی جائے گی۔ کارڈینلز کا اجلاس ہر روز منعقد ہو گا جس میں وہ چرچ کے روز مرہ کے معاملات کو طے کریں گے تاہم روایت کے مطابق نئے پوپ کا چناؤ پوپ کی وفات کے پندرہ دن تک شروع نہیں کیا جا سکتا۔ بی بی سی کے ایک اور نامہ نگار کے مطابق ابھی نئے پوپ کے بارے میں کوئی قیاس آرائی کرنا قبل از وقت ہو گا۔ ویٹیکن کے مذہبی رہمنا اور اطالوی حکام جن میں اطالوی وزیر اعظم سلو بیلسکونی بھی شامل تھے اتوار کو پوپ کا آخری دیدار کر چکے ہیں۔ | 
یہ صفحہ دوست کو ای میل کیجیئے
پرِنٹ کریں
