اسرائیل چن چن کر حماس کے رہنماؤں کو مار رہا ہے

ان کی ہلاکت کار پر اسرائیلی حملے میں ہوئی۔ کار میں ایک شخص اور بھی ہلاک ہوا ہے۔

عدنان اسرائیل کی انتہائی مطلوب افراد کی فہرست میں شامل تھے۔ حماس کے ایک ترجمان نے کہا ہے اس ہلاکت کا انتقام لیا جائے گا۔

اطلاعات کے مطابق یہ حملہ غزہ شہر کے شمال میں ایک مسجد کے پاس ہوا اور فضا سے چلائے گئے دو اسرائیلی میزائلو نے ان کی گاڑی کو نشانہ بنایا۔

اس کے بعد ایک اسرائیلی ہیلی کاپٹر نے غزہ ہی میں ایک چھوٹے فلسطینی گروپ کے ایک رہنما کے گھر پر راکٹ بھی داغے مگر کسی کے ہلاک یا زخمی ہونے کی کوئی اطلاع نہیں ملی۔

عدنان الغول کے بارے میں کہا جاتا ہے کہ وہ انجینیئر تھی اور بم بنا سکتے تھے۔ انہیں قسم نامی راکٹ کا موجد بھی کہا جاتا ہے۔ شدت پسندوں نے گزشتہ کچھ مہینوں میں یہ راکٹ اسرائیلی علاقوں میں کئی مرتبہ چلایا ہے۔

بی بی سی کے نامہ نگار جیمز رینالڈ کہتے ہیں کہ حالیہ برسوں میں اسرائیلی پالیسی یہ ہے کہ وہ اہم فلسطینی رہنماؤں کے تعاقب میں ہے اور ان کو چن چن کر نشانہ بناتا ہے۔

حماس تنظیم کی اعلیٰ قیادت چھپی ہوئی ہے یا بھاگ رہی ہے اور اسرائیل کا خیال ہے اس کی کارروائی فلسطینی تحریک کو کمزور کرنے میں خاصی کارگر ثابت ہوئی ہے۔

عدنان الغول گزشتہ پندرہ سال سے اسرائیل کو مطلوب افراد کی فہرست میں شامل تھے۔ ان پر پہلے بھی کئی مرتبہ قاتلانہ حملے ہوئے تھے لیکن وہ ہر بار بچ گئے۔