اسرائیلی فوج نے فلسطینیوں کی طرف سے راکٹ حملوں کو روکنے کے لیے غزہ میں جو بڑی کارروائی شروع کی تھی اس میں شدت آتی جارہی ہے اور مزید اسرائیلی ٹینک غزہ میں داخل ہوگئے ہیں۔ اس کارروائی کے دوران حماس کے دو کمانڈروں سمیت دس فلسطینی مزید ہلاک ہوئے ہیں اور حماس نے کہا کہ وہ جوابی کارروائی کرے گی۔ حماس کا کہنا ہے کہ ان کے رہنماؤں کی کار کو اسرائیل کے ہواحملے میں نشانہ بنایا گیا اور کار دھماکے سے اڑ گئی۔ اس سے پہلے سولہ فلسطینیوں کے ہلاک ہونے کی اطلاع تھی جبکہ جمعہ کی جھڑپوں میں ہلاک ہونے والوں میں تین اسرائیلی بھی شامل ہیں۔ اسرائیلی فوج علاقے میں یہ کہہ کر آئی تھی کہ وہ فلسطینی علاقوں سے داغے جانے والے راکٹ حملوں کو روکنے کے لیے ایسا کر رہی ہے۔ دو سال میں ایسا پہلی مرتبہ ہوا ہے کہ اسرائیلی ٹینک جبالیہ پناہ گزیں کیمپ کے وسط تک آگئے ہوں۔ اسرائیل کے وزیرِ اعظم ایریئل شیرون نے بدھ کو اس وقت مزید اسرائیلی فوج غزہ بھیجنے کا حکم دیا تھا جب فلسطینی علاقے سے چلائے جانے والے راکٹوں سے قریب کے اسرائیلی قصبے سڈیروٹ میں دو بچے مارے گئے تھے۔ | 
یہ صفحہ دوست کو ای میل کیجیئے
پرِنٹ کریں
