عبادالحق بی بی سی اردو ڈاٹ کام،لاہور

	پاکستان کا موقف ہے کہ حملوں میں ملوث افراد پر پاکستان میں ہی مقدمہ چلایا جائے گا

سیچنر کو اپنے آبائی شہر ملتان میں میڈیا سے بات کرتے ہوئے شاہ محمود قریشی نے کہا کہ بھارت نے ممبئی حملوں کے بارے میں جو معلومات پاکستان کو فراہم کی ہیں ان پر تحقیقات کو پہلے بھارت اور پھر دیگر دوستوں کے ساتھ شیئر کیا جائے گا۔

ان کا کہنا ہے کہ بھارت نے پاکستان کو عالمی اور سفارتی سطح پر تنہا کرنے کی کوشش کی تھی لیکن ’پاکستان نے جو حکمت عملی اپنائی اس کو آج دنیا پھر میں سراہا جارہا ہے اور پاکستانی موقف کی پہلے سے زیادہ تائید ہو رہی ہے۔‘

پاکستانی وزیر خارجہ کا کہنا ہے کہ بھارت کے موقف میں کوئی مستقل مزاجی نہیں ہے اور اس کا موقف تبدیل ہوتا رہتا ہے جبکہ بقول ان کے پاکستان آج بھی اس موقف پر قائم ہے کہ ممبئ کے واقعہ میں اگر کوئی پاکستانی ملوث ہے تو پاکستانی قوانین اور عدالتوں میں اس پر مقدمہ چلایا جائے گا۔

انہوں نے مزید کہا کہ پاکستان ایمانداری سے چاہتا ہے کہ ممبئی حملوں میں جو بھی عناصر ملوث ہیں ان کو بے نقاب کیا جائے۔

دونوں ملکوں میں جنگ کے امکانات کے سوال پر انہوں نے کا کہا پاکستان کو چوکنا رہنے کی ضرورت ہے لیکن پاکستان کسی جنگی جنون میں مبتلا نہیں ہے۔

ان کا کہنا ہے کہ پاکستان کا پہلے دن سے جنگ نہ کرنے کا موقف رہا ہے اور اب بھارت میں بھی ایسی آواز ابھر رہی ہیں کہ جنگ مسئلہ کا حل نہیں بلکہ اس سے معاملہ مزید خراب ہوگا۔

ایک دیگر سوال پر پاکستانی وزیر خارجہ کا کہنا تھا کہ پاکستان اور افغانستان کے تعلقات میں بہتری آئی ہے۔