عامر احمد خان بی بی سی اردو ڈاٹ کام، اسلام آباد

تمام معاملات پر کوئی شنوائی نہیں  گو وہ پارٹی کے سینئر ترین رکن ہیں لیکن اس کے باوجود ان تمام معاملات پر ان کی کوئی شنوائی نہیں تھی لہذا انہوں نے یہی مناسب سمجھا کہ پارٹی عہدے سے مستعفی ہو جائیں   مجید ملک

حال ہی میں پاکستان مسلم لیگ کے سینئر نائب صدر کے عہدے سے استعفی دینے والے جنرل ریٹائرڈ مجید ملک نے کہا ہے کہ وہ صدر مشرف کے موجودہ اسمبلیوں سے باوردی انتخاب کے خلاف اور تمام سیاسی رہنماؤں بشمول بینظیر بھٹو اور نواز شریف کے ساتھ سیاسی مفاہمت کے حق میں ہیں۔

بی بی سی اردو ڈاٹ کام سے بات کرتے ہوئے مجید ملک نے کہا کہ گو وہ پارٹی کے سینئر ترین رکن ہیں لیکن اس کے باوجود ان تمام معاملات پر ان کی کوئی شنوائی نہیں تھی لہذا انہوں نے یہی مناسب سمجھا کہ پارٹی عہدے سے مستعفی ہو جائیں۔

’میں مسلم لیگ کا پرانا ورکر ہوں اور عمر کے لحاظ سے سب سے سینئر لیڈر ہوں۔ لیکن اب میں سمجھتا ہوں کہ پارٹی کا جو فیصلہ ہے اور موجوہ ملکی صورتحال کے حوالے سے جو میرے خیالات ہیں وہ بالکل مختلف ہیں لہذا میں نے یہ سمجھا کہ میں اس عہدے سے معذرت کرلوں۔ تاہم میں ورکنگ کمیٹی اور پارٹی کا ممبر رہوں گا۔

مجید ملک کا کہنا تھا کہ انہوں نے پارٹی سے باقاعدہ درخواست کی تھی کہ صدر صاحب وردی کے بغیر انتخابات میں حصہ لیں اور آئندہ اسمبلیوں کے ذریعے منتخب ہوں۔ ان کی رائے میں اس طرح صدر مشرف آرام سے دوبارہ منتخب بھی ہو سکتے ہیں جب کہ اس کے برعکس کوئی قدم ملکی مفاد میں نہ ہو گا۔

اس کے علاوہ مجید ملک کے مطابق ان کا مسلم لیگ قاف کو یہ بھی مشورہ تھا کہ آجکل کی ابتر صورتحال میں بے نظیر، نوازشریف اور الطاف حسین کو وطن واپس آنا چاہیے۔

صدر وردی کے بغیر انتخابات لڑیں  پارٹی سے باقاعدہ درخواست کی تھی کہ صدر صاحب وردی کے بغیر انتخابات میں حصہ لیں اور آئندہ اسمبلیوں کے ذریعے منتخب ہوں۔ ان کی رائے میں اس طرح صدر مشرف آرام سے دوبارہ منتخب بھی ہو سکتے ہیں جب کہ اس کے برعکس کوئی قدم ملکی مفاد میں نہ ہو گا   مجید ملک

’سب سے بڑی بات یہ ہے کہ آرمی وہ طاقت تھی جو اللہ کے بعد ملک کی حفاظت کرتی ہے۔ لیکن اب اس کے خلاف عوام میں کیا رائے بن رہی ہے۔ میں نے خود ایس ایس جی کو کمانڈ کیا ہوا ہے۔ ان پر حملے کے بعد سے میں سخت دکھی ہوں۔ میرا یقین ہے کہ اس طرح کے انتہائی سنجیدہ مسائل کا حل صرف اتفاق رائے کے ذریعے ممکن ہے‘۔

مجید ملک کا کہنا تھا کہ وہ نہ تو سازش پر یقین رکھتے ہیں اور نہ ہی گروپ بنانے میں۔

’میں عمر کے اس حصے میں ہوں جہاں مجھے نہ تو سینیٹر شپ چاہیے نہ مجھے ایم این اے بننا ہے اور نہ ہی ٹکٹ کی ضرورت ہے۔ میرا صرف اور صرف ایک نظریہ ہے جس میں پاکستان، پاکستان مسلم لیگ اور فوج تین بنیادی چیزیں ہیں۔ اور اگر میں ان کی بہتری کے لیے حصہ نہیں لے سکتا تو میں نے یہی بہتر سمجھا کہ معذرت کرلوں‘۔