ریاض سہیل بی بی سی اردو ڈاٹ کام، کراچی

ابھری ہوئی چھپائی کی وجہ سے نابینا اس نوٹ کو آسانی سے پہچان سکیں گے

بینک دولتِ پاکستان کے گورنر عشرت حسین نے جمعہ کو ایک پریس کانفرنس میں بتایا کہ بیس روپے کے اس نوٹ میں دس نئی خصوصیات شامل ہیں۔

یہ نوٹ یورو کے معیار پر بنایا گیا ہے، اس میں قائد اعظم محد علی جناح کی تصویر دوسرے نوٹوں کے مقابلے میں بڑی ہے اور ابھری ہوئی چھپائی کی وجہ سے نابینا افراد بھی اس نوٹ کو آسانی سے پہچان سکتے ہیں۔

عشرت حسین نے بتایا کہ پرنٹنگ ٹیکنالوجی میں جدت آنے سے جعلی نوٹوں کا خدشہ بڑھ گیا ہے مگر یہ نوٹ ہم نے ایک قدم آگے بنایا ہے۔ اس نوٹ کا جعلی نوٹ بنایا نہیں جا سکتا جبکہ اس کی اسکیننگ یا کاپی بھی نہیں کی جا سکتی۔

گورنر اسٹیٹ بینک نے بتایا کہ پہلی مرتبہ نوٹ پر چھپائی کا سال دیا گیا ہے۔ یہ ایک ملٹی کلر نوٹ ہے جس پر بیس کا ہندسہ بھی مختلف رنگوں میں ہے۔

انہوں نے بتایا کہ اس نوٹ کے عقب میں شائع کی گئی تصویر کے مقام کا نام بھی دیا گیا ہے۔ اس نوٹ پر موہنجودڑو کی تصویر دی گئی ہے۔ نوٹ کی چوڑائی پیسنٹھ ملی میٹر ہے جبکہ ’حصول رزق حلال عبادت ہے‘ دائرے میں تحریر کیا گیا ہے۔

انہوں نے بتایا کہ ہم اس نوٹ کو یوم آزادی پر جاری کرنا چاہتے تھے مگر اس روز بینک بند ہونے کی وجہ سے ایک دن قبل جاری کیا جارہا ہے۔