اعجاز مہر بی بی سی اردو ڈاٹ کام، اسلام آباد

نواز شریف کے اقتدار سے ہٹنے کے بعد یہ ان کی بینظیر بھٹو سے پہلی ملاقات ہوگی

آصف علی زرداری نے دبئی سے فون پر بی بی سی سے بات کرتے ہوئے بتایا کہ وہ بدھ کے روز عمرہ ادا کرنے کے لیے سعودی عرب جا رہے ہیں اور اس دوران میاں نواز شریف سے تفصیلی ملاقات کریں گے۔

بینظیر بھٹو اور نواز شریف دونوں پاکستان کے دو دو بار وزیراعظم رہ چکے ہیں اور ملک سے باہر زندگی گزار رہے ہیں۔

دونوں ماضی میں ایک دوسرے کے سیاسی مخالف رہ چکے ہیں لیکن ان دنوں دونوں کی جماعتیں ’اتحاد برائے بحالی جمہوریت‘ کے پلیٹ فارم پر اکٹھی ہوکر حزب اختلاف کا کردار ادا کر رہی ہیں۔

آصف زرداری کے مطابق پاکستان پیپلز پارٹی اور مسلم لیگ نواز پاکستان کی بڑی سیاسی قوتیں ہیں اور ان کے سربراہان ملک کی سیاسی صورتحال کا جائزہ لے کر مستقبل کے بارے میں لائحہ عمل پر تبادلہ خیال کریں گے۔

امکان ہے کہ نواز بینظیر ملاقات کے دوران دو ماہ بعد ملک میں مجوزہ بلدیاتی انتخابات کے دوران سیاسی تعاون کے معاملے پر بھی بات چیت کریں گے۔