عبدالرشید شکور بی بی سی اردو ڈاٹ کام، کراچی

نور فاطمہ جو بنگلور میں علاج کے بعد دونوں ملکوں کے درمیان دوستی کی علامت بن گئی

لدھیانہ سے تعلق رکھنے والے ڈاکٹر تیجندر سنگھ نے کہا ہے کہ لدھیانہ کی موہن دائی کینسر ٹریٹمنٹ اینڈ ریسرچ فاؤنڈیشن کے بورڈ نے اپنے ہسپتال میں کینسر میں مبتلا پاکستانی مریضوں کے مفت علاج کی منظوری دی ہے جس کے بعد وہ یہ پیشکش کررہے ہیں کہ ایسے بیس مریضوں کا بھارت میں علاج کرایا جائے گا جو اخراجات برداشت نہیں کرسکتے۔

ڈاکٹر تیجندر سنگھ نے کہا کہ وہ امن وآشتی کا پیغام لے کر پاکستان آئے ہیں اور ان کی یہ پیشکش دراصل اس پیغام کو عام کرنے کے سلسلے کا عملی قدم ہے۔
واضح رہے کہ پاکستان کے مقابلے میں بھارت میں سرطان کے علاج کی بہتر سہولتیں موجود ہیں۔

پاکستان میں نجی شعبے میں عمران خان شوکت خانم اسپتال کے ذریعے دکھی انسانیت کی خدمت میں مصروف ہیں لیکن انہیں وسائل کی شدید کمی کا سامنا ہے جس کے لیے وہ فنڈ اکٹھا کرنے کی مہم چلاتے رہتے ہیں۔ بھارتی ادارکار عامر خان کی پاکستان آمد اسی سلسلے کی کڑی ہے۔

بھارت سے آئے ہوئے ڈاکٹروں نے اپنے پاکستانی میزبانوں کے ساتھ یہ آواز بلند کی ہے کہ دونوں ممالک ایٹمی ہتھیاروں کی دوڑ ختم کرکے اپنے بجٹ کا بڑا حصہ عوام کی بھلائی پر خرچ کریں جو اس وقت زیادہ تر دفاع پر خرچ ہورہا ہے۔