افغانستان سے اسلحہ سمگل کرنے کی کوشش ناکام

فرنٹیئر کانسٹیبلری کے ترجمان کرنل باسط رانا کے مطابق کوئٹہ کے شمال مغرب میں ایک سو پینتیس کلومیٹر پر واقع شہر چمن کے قریب ہونے والی فائرنگ کے بعد اسلحہ قبضے میں لے لیا گیا ہے۔

انہوں نے کہا کہ سرحدی محافظوں نے اس وین کو روک لیا جس میں پانچ راکٹ لانچر، دو طیارہ شکن مشین گنیں، پانچ رائفلیں اور دیگر اسلحہ موجود تھا جسے کسی دہشت گرد کارروائی کے لئے پاکستان سمگل کرنے کی کوشش کی جا رہی تھی۔ تاہم کرنل باسط رانا نے مزید تفصیلات نہیں بتائیں ہیں۔

اطلاعات کے مطابق فائرنگ کے تبادلے کے سبب اسلحہ سمگل پاکستان سمگل کرنےکی کوشش کرنے والے افراد افغانستان کی طرف فرار ہو گئے۔ یہ بھی واضح نہیں ہو سکا کہ وین میں کتنے لوگ سوار تھے۔

حالیہ ہفتے کے دوران یہ دوسرا واقعہ ہے کہ پاکستانی حکام نے ملک کے جنوب مغربی حصے سے اسلحہ اپنے قبضے میں کیا ہے۔

جمعرات کو پولیس نے کوئٹہ کے شمال مشرق میں دو سو کلومیٹر پر واقع گاؤں کاکرخورسان میں ایک گھر پر چھاپہ مار کر تینتالیس راکٹ گولے، نوے ماٹر گولے، اٹھارہ سو طیارہ شکن گولے، پینسٹھ دستی بم اور بارودی سرنگ کو اڑانے والے فیوز برآمد کئے تھے۔