محققین کا کہنا ہے کہ بچوں کی نشونما میں یہ بات زیادہ اہم ہو سکتی ہے کہ ایک ماں اپنے بچے کے جذبات کو کس حد تک سمجھتی ہے بہ نسبت اس کے کہ بچے کے خاندان کا معاشرے میں کیا مقام اور رتبہ ہے۔ اس مطالعہ سے حاصل ہونے والے نتائج ’شوئر سٹارٹ‘ جیسے منصوبوں کے لیے کارگر ثابت ہو سکتے ہیں جن کا مقصد ایسے افراد کی مدد کرنا ہے جو پہلی بار والدین بنے ہوں۔ سماجی و اقتصادی تحقیق کی کونسل کی ایک ٹیم نے دو سو سے زائد ماؤں اور ان کے بچوں کا مطالعہ کیا ہے۔ ان میں سے نصف خواتین نے سولہ برس کی عمر میں سکول جانا ترک کر دیا تھا اور بے روزگار تھیں یا نچلی سطح کی ملازمت کرتی تھیں۔ ان ماؤں اور ان کے بچوں کے باہمی ربط اور حرکات پر اس وقت نگاہ رکھی گئی جب بچوں کی عمریں آٹھ، چودہ اور چوبیس ماہ تھیں۔ محققین نے ماؤں اور بچوں کے کھیلنے کی وڈیو فلمیں بنائیں اور اس بات پر غور کیا کہ کھیلتے وقت مائیں اپنے بچوں سے کیا کہہ رہی تھیں؟ ڈرہم یونیورسٹی میں ڈاکٹر الیزبیتھ مِینز کے زیرِ قیادت محققین کی ٹیم کا کہنا ہے کہ اگرچہ اس طرح سے مطالعہ سے حاصل ہونے والے نتائج میں واضح ہم آہنگی موجود ہے لیکن یہ زیادہ مضبوط نہیں ہے۔ | 
یہ صفحہ دوست کو ای میل کیجیئے
پرِنٹ کریں
