 |  بڑے پیمانے پر تباہی پھیلانے والے ہتھیاروں پر قابو پایا جائے |
امریکہ نے بڑے پیمانے پر تباہی پھیلانے والے ہتھیاروں پر قابو پانے کے لئے اقوام متحدہ میں ایک قرارداد کا مسودہ پیش کیا ہے۔ قرارداد کے تحت اس نوعیت کے ہتھیاروں کو دہشت گردوں کے ہاتھ لگنے سے بچایا جا سکے گا۔ اس قرارداد کا ایک مقصد بڑے پیمانے پر تباہی پھیلانے والے ہتھیاروں کے عدم پھیلاؤ سے متعلق قوانین میں پائی جانے والی کمزوریوں کو دور کرنا بھی ہے۔ قرارداد کے اس مسودے پر آئندہ چند دنوں میں بحث کی جائے گی لیکن ابھی یہ طے نہیں کہ اس پر رائے دہی کب ہو گی۔ اس قرارداد کے متعارف کرائے جانے کے لئے پہل گزشتہ برس صدر بش نے کی تھی۔ اقوام متحدہ کے لئے برطانوی سفیر کا کہنا تھا کہ سلامتی کونسل کو نہ صرف ان ہتھیاروں پر بلکہ ان کے دہشت گردوں کے ہاتھ نہ لگنے کے لئے بھی کام کرنا ہوگا۔ قرارداد کے اس مسودے کو منظوری کے لئے ممبر اراکین کی بھرپور حمایت درکار ہو گی۔ اس مسودے کے متن میں یہ بھی کہا گیا ہے کہ ممبر ممالک کو اپنے ملکوں میں تیار ہونے والے اسی نوعیت کے کسی بھی اسلحے کے بارے میں مکمل آگاہی بھی فراہم کرنا شرط ہے۔ امریکہ کی جانب سے پیش کردہ اس مسودے کو برطانیہ سمیت سلامتی کونسل کے مستقل اراکین جن میں روس ،فرانس اور چین شامل ہیں کی بھرپور حمایت حاصل ہے۔ | 
یہ صفحہ دوست کو ای میل کیجیئے
پرِنٹ کریں
