پابندی کے عرصے کے دوران مصر میں رہنے والی غیر ملکی رقاصاؤں نے رقص سکھانا شروع کر دیا تھا

دو سال پہلے حکومت نے یہ پابندی لگائی تھی کہ غیر ملکی رقاصائیں اور رقاص مصر میں اپنے فن کا مظاہرہ نہیں کر سکتے لیکن ایک بار اس نے اپنے اس فیصلے کو تبدیل کیا ہے اور ایک بار پھر غیر ملکی رقاصوں کو مصر میص کام کرنے اور اپنے فن کا مظاہرہ کرنے کی اجازت دے دی ہے۔

مصر کی ایک سابق بیلی ڈانسر دیواس نغمہ فواد اب ایک ایسی تنظیم بنانے کے بارے سوچ رہی ہیں جس کے ذریعے اس فن کو محفوظ رکھنے کے اقدام کیے جا سکیں۔

دریائے نیل کے کنارے بیلی ڈانس کا ایک سٹڈیو واقع ہے جس میں مشق کا مخصوص لباس پہنے لیزا لذیذہ نہ صرف اپنا ریاض کرتی ہیں بلکہ ڈانس سکھاتی بھی ہیں۔

لذیذیہ ایران میں پیدا ہوئی تھیں لیکن اب وہ دنیا کی جانی پہچانی بیلی ڈانسر ہیں۔ وہ پانچ سال پہلے قاہرہ آئی تھیں۔ قاہرہ میں یہ بیلی ڈانس صدیوں پہلے شروع ہونے کی روایت رکھتا ہے۔

لذیذہ بیلی ڈانس کے مخصوص لباس میں

لیزا گزشتہ دو سال کے دوران پابندی کی وجہ سے مصر کے کسی بھی بڑے سٹیج پر اپنے فن کا مظاہرہ نہیں کر سکیں۔

ان کا کہنا ہے کہ ’جہاں تک میرا خیال ہے اب ڈانس بڑی تیزی سے پیچھے جا رہا ہے جب کہ ماضی میں فن کو ترجیج دی جاتی اور سراہا جاتا تھا‘۔

لیزا نے انتہائی افسوس سے کہا ’میرے لیے یہ انتہائی سنجیدہ بات ہے کہ جو کچھ ہو رہا ہے میں بھی اس کا حصہ ہوں، میں بھی اس ڈانس پر آنے والے اس عظیم زوال میں شامل ہوں‘۔

جب غیر ملکیوں پر یہ پابندی تھی کہ وہ عام سٹیج پر اپنے فن کا مظاہرہ نہیں کر سکتے تو لیزا گزر اوقات کے لیے رقص سکھانے کا کام کرتی تھیں۔

اب حکومت نے یہ پابندی واپس لے لی ہے اور انہیں ایک بار پھر یہ آزادی مل گئی ہے کہ وہ اپنے فن کا مظاہرہ کر سکتی ہیں لیکن اب مشکل یہ ہے کہ جو رقص وہ کرنا چاہتی ہیں اس کے لیے انہیں سٹیج دستیاب نہیں ہے۔

ان کا کہنا ہے کہ ’ایک وقت تھا کہ مصر رقص کے نظامِ حواس کا مرکز تھا‘۔

لیزا کا کہنا ہے کہ رقص کے نام پر جو ہو رہا ہے اس میں فن پیچھے چلا گیا ہے

انہوں نے کہا کہ انہی بنیادوں پر میں کہہ سکتی ہوں کہ مصر میں بیلی ڈانس پس منظر میں جا رہا ہے۔