حماد ناصر لندن

منی ایچر پینٹنگ ہات سے بنے کاغذ ’وسلی‘ پر کی جاتی ہے

محمد عمران قریشی نے لاہور کے نیشنل کالج آف آرٹس سے منی ایچر پینٹنگ کے شعبے میں تعلیم مکمل کرنے کے بعد وہیں پر طلباء کو منی ایچر پینٹنگ کے ہی شعبے میں تربیت دینے کا آغاز کیا۔

تعلیمی شعبے سے وابستگی کی تمام تر مصروفیات کے باوجود عمران قریشی نے اپنے فن کا لوہا منویا اور اب ان کا شمار ایسے پاکستانی فنکاروں میں ہوتا ہے جنہیں بین الاقوامی سطح پر پذیرائی حاصل ہوئی ہے۔

عمران قریشی کے فن پارے دنیا کی ممتاز عوامی اور نجی نمائش گاہوں کے علاوہ لندن کے مشہور وکٹوریا اینڈ البرٹ میوزیم میں بھی رکھے گئے ہیں۔

مغل اور پہاڑی منی ایچر پینٹگ کی روایات کو برقرار رکھنے کے علاوہ عمران نے فن پاروں میں امریکی ماڈرن طرز مصوری کے پینٹر سی تھومبلی کے سٹائل کی شبیہ بھی شامل کی ہے۔

لندن میں نمائش کے لئے رکھی گئی پینٹنگز، بین الاقوامی سیاست کے بارے میں عمران کے موقف کی ترجمان ہیں۔