Акс: Даргириҳо дар Укройн

Пулис дар Киев, пойтахти Укройн ҳамлаи тозаеро ба тазоҳуркунандагони мухолифи давлат оғоз кардааст. Ин дар ҳоле аст ки шумори кушташудагон дар даргириҳои ахир ба 25 нафар расидааст.

Талоши тоза барои мутафарриқ кардани тазоҳуркунандагон дар ҳоле оғоз шудааст, ки президент Янукович раҳбарони мухолифонро масъули афзоиши хушунат тайи моҳҳо нооромӣ дар кишвар хондааст.

Оқои Янукович пас аз анҷоми бенатиҷаи музокирот бо раҳбарони мухолифон дар шаби гузашта аз онҳо хостааст аз нерӯҳои тундрав фосила бигиранд.

Фаъъолони мухолифон мақомотро масъули бурузи хушунатҳои ахир медонанд.

Пулис кунтрули бахше аз майдонро барои нахустин бор аз моҳи декабр дар даст гирифтааст.

Пулис ҳамлаи ахири худ ба майдони Истиқлол, мавсум ба Майданро муддати кутоҳе пас аз соъати чаҳори бомдоди чаҳоршанбе ба вақти маҳаллӣ оғоз кард.

Вазорати беҳдошт бо интишори баёнияе эълом кард, ки шумори кушташудагони ҳар ду ҷониби даргир ба 25 нафар расидааст. Вазорати умури дохила мегӯяд 9 тан аз кушташудагон маъмурони пулис ҳастанд. Як хабарнигор ҳам дар миёни кушташудагон аст. Муътаризони мухолифи давлат маъмури захмии пулисро интиқол медиҳанд.

Садҳо нафар дар бемористонҳо ба далели бардоштани ҷароҳат бистарӣ шудаанд ва бими он меравад, ки шумори афроди кушташуда афзоиш ёбад.

Эътирозот дар Укройн дар моҳи ноябр пас аз он оғоз шуд, ки Виктор Янукович, раиси ҷумҳурии Укройн, ба ҷойи имзои паймони тиҷорати озод бо Итиҳодияи Урупо эълом кард қасд дорад равобити иқтисодӣ бо Русияро густариш диҳад.

Хушунатҳо дар муқобили сохтмони порлумон рӯзи сешанбе пас аз он оғоз шуд, ки тарафдорони ҳукумат монеъи амалӣ шудани талоши мухолифин барои маҳдуд кардани ихтиёроти раиси ҷумҳур шуданд.