Gen. Sani Abacha

Di main tori wey happun for di life of di late dictator

E don reach 20 years since Nigerian military ruler Sani Abacha die.

Na wit iron hand im bin take rule Nigeria and plenti human rights wahala full im goment.

Even till today, Abacha na pesin wey still dey cause kwanta for im kontri. President Muhammadu Buhari, wey imsef be former military ruler, don hail am for di ogbonge tins wey im do like roads wey im build, education and health.

See as di life of di late dictator take waka

20 September 1943

Kano, Nigeria

Na for Kano State, northern Nigeria dem born General Sani Abacha.
1963

Im finish school for di Nigerian Military Training Centre for Kaduna den do more training for UK.
1965

Nigeria

Im marry Maryam Jiddah. Dem born 10 pikin, but one of dem come later die.
1967-72

Southern Nigeria

During civil war for Nigeria, Abacha fight for di federal side against Biafra and im continue to dey chop express promotion for army.
1983

Lagos, Nigeria

Im name first enta di mouth of Nigerians sake of im connect wit di 31 December coup wey comot civilian Presido, Shehu Shagari. Gen Buhari na di next pesin wey wear di cap as military ruler.
1985

Lagos, Nigeria

Na wit force dem comot Gen Buhari for coup wey Abacha support. Im help Gen Ibrahim Babangida takeover and dem uprade am to major general.
12 June 1993

Lagos, Nigeria

Dem do democratic elections wey military bin don dey promise tey tey. Early results show say na rich businessman Moshood Abiola dey win but Gen Babangida do u-turn cancel di result wey vex Nigerians.
August 1993

Abuja, Nigeria

Abacha upgrade to Minister of Defence afta Babangida, wey resign later, make Ernest Shonekan civilian presido in charge of goment for di main time.
17 November 1993

Abuja, Nigeria

Shonekan resign afta im cari im power give Abacha. Sabi pipo suspect dis u-turn na anoda coup. Abacha rule boku wit human rights wahala and di way im harsh on top opposition.
1994

Nigeria

Moshood Abiola, wey many Nigerians believe win di 12 June election, crown imsef president for Lagos and na dis land am for prison.
1995

Ogoni, Nigeria

Abacha goment chop black eye afta dem condemn am all over di world and dem collect suspension from Di Commonwealth afta dem execute di Ogoni Nine, wey be activists wey dey protest di bad bad tins goment and oil big boys Shell dey do. Among di activists wey die na writer and Nobel Prize nominee Ken Saro-Wiwa.
1996

West Africa

Dem choose Abacha as chairman for di Economic Community of West African States (Ecowas), wey be economic join-body for di region.
February 1998

Sierra Leone

Abacha send Nigeria military go Sierra Leone wit mission to comot di military goment wey tanda for dia afta dem bin comot civilian goment one year before den.
8 June 1998

Abuja, Nigeria

Abacha die unto suspected heart attack and dem bury am for di same day. Nigeria begin journey go meet democracy one year later.