Bayanan juyin mulkin da suka yi nasara a Afirka cikin sama da shekara 70

A 1972 Janar Ignatius Kutu Acheampong ya jagoranci juyin mulki da babu zubar da jini, wajen tumbuƙe zaɓaɓɓiyar gwamnatin Firaministan Ghana Dakta Kofi Busia. Shekara shida bayan haka aka tuɓuke shi a wani juyin mulkin masarauta sannan kuma aka kashe shi shekara guda bayan haka.

Thomas Sankara ya zama shugaban Burkina Faso a 1983, bayan wani juyin mulki da sojoji suka yi a madadinsa, a lokacin da yake ƙarƙashin ɗaurin talala. A ranar 15 ga watan Oktoban 1987 wata ƙungiyar masu ɗauke da makamai suka kashe Sankara a lokacin wani juyin mulki da Blaise Compaore ya jagoranta.

Gaafar Nimeiry ya tunɓuke shugaban Sudan Ismail al-Azhari a 1969, sannan ya karɓe iko, da farko a matsayin shugaban mulkin soji, sannan ya zama shugaban ƙasa, kafin a kifar da gwamnatinsa a 1985.

Jean-Baptiste Bagaza ya tumɓuke shugaban ƙasar Burundi Michel Micombero a 1976 sannan ya karɓe mulki. shekara 11 bayan hakan ne kuma aka hamɓarar da shi, lamarin da tilasta masa gudun hijira.

Omar al-Bashir ya zama shugaban ƙasar Sudan a 1989 a lokacin da yake muƙamin Burgediya Janar a rundunar sojin ƙasar, ya jagoranci sojoji wajen kifar da zaɓaɓɓiyar gwamnatim ƙasar. Daga nan ya ci gaba da zama shugaban Sudan har zuwa 2019 lokacin da wani juyin mulkin soji ya kifar da gwamnatinsa.

François Bozizé Yangouvonda ya ƙwace mulki a 2003. Inda ya zama shugaban ƙasar Jamhuriyar Tsakiyar Afirka. Shekara 10 bayan haka aka hamɓarar da shi.

Barinsa a cikin dangi

Ƙwace mulki al'ada ce ta dangi a wasu ƙasashen. Alal Misali a Equatorila Guinea, Teodoro Obiang Nguema Mbasogo - wanda ɗan ɗan'uwan shugaban ƙasar Francisco Macias Nguema - ne ya yi masa juyin muyin mulki a 1979. Zuwa shekarar 2024 Teodoro ne shugaban ƙasa - wanda ba na sarauta ba - na biyu mafi jimawa a karagar mulki.

Laurent Kabila ya hamɓarar da Shugaba Mobutu Sese Seko a 1997, sannan ya zama shugaban DR Kongo na uku. Daga baya kuma ɗansa mai shekara 29, Joseph Kabila ya gaje shi bayan da ɗaya daga cikin masu kare lafiyarsa ya kashe shi.