|
|
|
Adnabod
Awdur:
Twm Morys
Bardd ac awdur y nofel Ein
Llyw Cyntaf
Dydd Iau, Medi 20, 2001
|
• Enw:
Twm Morys.
• Beth yw eich gwaith?
Bardd.
• Pa waith arall ydych chi wedi bod yn ei wneud?
Gwneud gwaith ymchwilydd a sgwennwr sgriptiau i Radio Cymru;
bysgio; darlithio yn Llydaw; cyflwyno rhaglenni teledu, bron iawn
i gyd ar fydr ac odl!
• 0 ble’r ydych chi’n dod?
O Lanystumdwy.
• Lle’r ydych chi¹n byw yn awr?
Yn Llanystumdwy.
• Wnaethoch chi fwynhau eich addysg?
.Dwi ddim yn meddwl mai 'mwynhau' ydi'r gair iawn. Rhywbeth sy'n
digwydd ichi ydi addysg.
• Beth wnaeth ichi sgrifennu eich llyfr diweddaraf? Dwedwch ychydig
amdano.
Cael fy nghomisiynu wnes i i drosi nofel gan Jan Morris. Dwi wedi
cydweithio o'r blaen efo hi. (Tydw i'n fab iddi, wedi'r cwbwl!) Y
gwaith mawr bob tro ydi addasu'r darnau fasai'n amlwg i ddarllenwyr
Cymraeg, heb newid gormod ar y stori.
• Pa lyfrau eraill ydych chi wedi eu sgrifennu?
Cyfrol o farddoniaeth o dan y teitl Ofn Fy Het; cyfrol
arall o farddoniaeth ar y cyd efo'r Prifardd Iwan Llwyd o dan y teitl
Eldorado. Ysgrif i Wasg Gregynog o dan y teitl Grwyne Fawr.
• Pa un oedd eich hoff lyfr pan yn blentyn?
The Welsh Fairy Book gan W. Jenkyn Thomas
• A fyddwch yn edrych arno’n awr?
Byddaf, yn amal.
• Pwy yw eich hoff awdur?
Yn Gymraeg, Robin Llywelyn. Yn Saesneg, yr Americanwr Raymond
Carver.
• A oes unrhyw lyfr wedi gwneud argraff arbennig neu ddylanwadu
arnoch?
Ugeiniau ohonyn nhw! Chwedlau'r Mabinogi yn un.
• Pwy yw eich hoff fardd?
Dafydd ap Gwilym
• Pa un yw eich hoff gerdd?
O waith Dafydd, Achau Hiraeth.
• Pa un yw eich hoff linell o farddoniaeth?
Heddiw: nid yw Duw mor greulon ag y dywed hen ddynion (Dafydd
ap) Ond fory, pwy wyr?
• Pa un yw eich hoff ffilm a rhaglen deledu?
Yn rhyfedd iawn, dwi wrth fy modd efo hen ffilmiau du a gwyn Saesneg,
fel Brief Encounter, neu ffilmiau rhyfel yn dangos y Natsis
yn colli'r dydd. Fydda'i ddim yn gwylio'r teledu ryw lawer, ond cefais
flas ar C'mon Mid Ffild, wrth reswm, a Talcen Caled
hefyd.
• Pwy yw eich hoff gymeriad a’ch cas gymeriad mewn llenyddiaeth?
Mae Ifas y Tryc, a Gwydion y Mabinogi, a Glendower Shakespeare,
a'r Soldiwr Da Sweig, a Ponsiws Peilot hefyd, yn hoff gymeriadau gen
i.
Fy nghas gymeriad ydi'r snichyn Rhys Meigen.
• Pa ddywediad, dihareb, adnod neu gwpled sydd agosaf at y gwir?
Glanaf o bawb, pysgodyn.
• Pa un yw eich hoff air?
Sgwarnog.
• Pa ddawn hoffech chi ei chael?
Y ddawn i chwarae jaz ar y piano. Mi fydda'i'n medru yn amal mewn
breuddwydion!
• Pa dri gair sy’n eich disgrifio chi orau?
Sgwarnocach na rhai.
• A oes rhywbeth yr ydych yn ei ddrwglecio amdanoch eich hunan?
Fy nhrwyn.
• Pa berson byw neu hanesyddol ydych chi¹n ei edmygu fwyaf a
pham?
Ar hyn o bryd, y bardd Leonard Cohen. Am ei fod o'n taro deuddeg
bob gafael. Ond arwyr eraill i mi ydi Iolo Morgannwg a Loyd Jorj.
• Pa ddigwyddiad hanesyddol fyddech chi wedi hoffi
bod yn rhan ohono?
Gwrthryfel Glyn Dwr, wrth reswm pawb.
• Pa berson hanesyddol hoffech chi ei gyfarfod a beth fyddech
chi yn ei ddweud neu yn ei ofyn?
Loyd Jorj! A'r hyn faswn i'n ei ddweud ydi: Dowch am beint i'r
Ffedars!
• Pa un yw eich hoff daith a pham?
Y daith adra i Eifionydd, am fy mod i wedi treulio llawer iawn gormod
o amser yn crwydro.
• Disgrifiwch eich hoff bryd bwyd?
Mynd efo Elis Gwyn yn ei gwch. Codi cimwch o gawell. Mynd â fo
adra mewn pwcad o dan swp o wymon. Dweud diolch wrth ei daflu o i'r
dwr berwedig. Gadael iddo oeri wedyn. Ei sglaffio efo toman o datws
Chwilog, a menyn Llyn.
• Beth yw eich hoff weithgareddau amser hamdden?
Cynganeddu, buta bwyd y môr, a'r hyn y bydd pob dyn iach yn ei
wneud efo enaid hoff cytûn.
• Pa un yw eich hoff liw?
Glas.
• Pa liw yw eich byd?
Glas.
• Pe gallech gyflwyno deddf newydd beth fyddai hi?
Bod yr iaith Gymraeg yn cael yr un hawl i fyw â slumod. Dach chi
wedi clywed, hwyrach, fod darn go fawr o'r lôn osgoi heibio Llanllyfni
ar gau, er ei bod yn barod, rhag dychryn y slumod sy'n magu eu cywion
o dan un o'r pontydd.
• A oes gennych lyfr arall ar y gweill?
Oes. Hon ydi ei enw o. Mae o ar y gweill ers rhai blynyddoedd.
Llyfr am Gymru, y wlad a'r chwedl. Ond dwi'n teimlo 'mod i'n dal yn
rhy ifanc i'w sgwennu o.
• Beth fyddai’r frawddeg agoriadol delfrydol i nofel neu waith
llenyddol arall?
Er gwaetha' cyfaddawd y seindorf…'
|
|
|
Gair
am air
Siart
Cymru
Llyfrau
ar y We
Nôl
i'r archif
