Ministirri waraanaa US Iraan ‘of eeggannoon akka filattu’ akeekkachiise

Haguuggii Tamsaasa Kallattii

1. 16 Ebla 2026'Dhukaasa dhaabuun Israa'elii fi Libaanos 'aaragalfii dha'' - Pirezdantii Komishinii Gamtaa Awurooppaa

   Dhukaasa dhaabuun Israa'elii fi Libaanos jidduu Tiraamp beeksise, 'aaragalfii dha' jedhan Pirezdantii Komishinii Gamtaa Awurooppaa Voon Deer Leeyan.

   "Walitti bu'iinsi sun lubbuu hedduu galaafatee waan jiruuf, kun aaragalfii dha," jedhan fuula X ofiirratti Aadde Voon Deer Leeyan.

   Amma karaa "nagaa waaraatti geessutu" barbaadama, "nagaa yeroof turu miti", jedhan.

   Awurooppaan "guutummaan kabajamuu birmadummaa Libaanosiif" waamicha gochuu itti fufti edhan.

2. 16 Ebla 2026Israa'elii fi Libaanos guyyoota 10'niif dhukaasa dhaabuuf waliigaluu Tiraamp hime

   Tiraamp ibsa isaa keessatti waayee hidhattoota Hizboolaa kan Iraan deeggartuu homaa hin kaafne.

   Ibsi isaa guutuun kunooti.

   "Kabajamtoota pireezdantii Libaanos Joosef Aawunii fi Ministira Muummee Israa'el Biibii Neetaniyaahuu waliin marii dansaa tolchine.

   "Hoggantoonni lamaanuu biyyoota isaanii jidduutti nagaa buusuuf waliigalaniiru, guyyoota 10f sa'aatii bahaa 11:00 waaree boodaa kaasee ifatti dhukaasa ni dhaabu.

   "Kibxata biyyoonni lamaan waggoota 34 keessatti yeroo jalqabaatiif Waashingtan DC keessatti wal arguun ministira dhimma alaa Maarkoo Ruubiyoo waliin mari'atan.

   "Pirezdantii itti aanaan JD Vaans, Ministirri dhimma alaa Maarkoo Ruubiyoo, Dura taa'aan Humnoota Waloo Daan Raazin, nagaa fulla'aa fiduuf Israa'elii fi Libaanos waliin akka hojjetan kallattii kaayefiin jira.

   "Asiin dura waraana addunyaa keenyaa 9 ta'u dhaabsisuu kiyyaan nan boona, Kuni 10ffaa ta'a jechuu dha, Itti fufna"

3. 16 Ebla 2026Pirezdantiin Libaanos carraaqqii dhukaasa dhaabsisuu itti jiruuf Tiraamp galateeffatan - Beerut

   Waajjirri pireezdantii Libaanos Pirezdantiin Libaanos Jooseef Oowin Tiraamp waliin har'a bilbilaan mari'achuu mirkaneesse.

   Ergaa fuula X, isaaniirrratti baasaniin Pirezdantiin Libaanon Jooseef Oowin carraaqqii Libaanos keessatti dhukaasni akka dhaabbatuu fi "nagaan waaraa fi tasgabbiin akka bu'u" godheef Tiraamp galateeffatan.

   Aawun Israa'elii fi Hizboolaa jidduu "saffisa danda'amu kamiinuu" dhukaasni akka dhaabbatu fedhii qaban mirkaneessan.

   Tiraamp Pireezdaantichaa fi Libaanosiif deeggarsa akka taasisu ibsuu dabalanii himan.

4. 16 Ebla 2026Ministirri Ittisaa Israa'el haleellaa 'hadhaawaaf' Iraanitti dhaadatan

   Ministeerri Ittisaa Israa'el, Israa'el Kaatiz Iraan yoo Ameerikaa waliin walii hin galle Israa'el "haleellaa hadhaawaa" Iraan irratti raawwatti jechuun dhaadatan.,

   "Iraan daandii qaxxaamuraa seenaa keessatti hin agarrerra jirti. Kun yeroo filannoo isaaniiti. Yookiin egeree ofii tolfachuu ykn barbadaawuu fi qoolliffatamuufi kophaatti hafuu,"

   Iraan kan lammataa filatti yoo ta'e, "saffisaan gatiishee argatti" Israa'el hanga ammaa qiyyaafannoowwan sanneen hin rukunne, "kan kana duraarra haleellaa hadhaawaa raawwanna."

   "Filannoon harka keessan keessa jira, bu'aan isaas keessani" jedhan.

5. 16 Ebla 2026Phaaphaasiin Kaatolikii Roomaa Abbootii irree waraanaaf biliyoonota baasan qeeqan

   Poop Liyoon daawwannaa isaanii biyya Afrikaa, Kaameruun irratti haasawa godhaniin hogganoota waraanaf dolaara biliyoonota dhangalaasan qeeqan. Dubbiin isaanii kun Donaald Tiraamp miidiyaa hawaasaa irratti irra deebiin isaan qeequu hordofee waan dhagahame.

   Haasawa kutaa bulchiinsa Baamendaa [iddoo waraanni miidhetti argamtu], keessatti godhaniin phaaphaasichi "kanneen maqaa Waaqaa fedhii waraanaa, diinagdee fi bu'aa siyaasaa isaaniif itti fayyadamanii fi amantii micciiranii" balaaleffatan.

   Jeequmsa dhugeeffachuuf amantaatti dhimma bahuu akka dhaaban akeekkachiisan.

   Naannawa hawaasa walitti bu'iinsaaf waggoota kurnan hedduu danqama gidduutti argamuu haasawa kan godhan dureen bataskaana Kaatolikii Roomaa, "nagaaf waamicha dhiyeessuun dhufe" jedhan. "Uummanni asii garuu ofiifuu waamicha dhiyeessuun, addunyaaf waamicha nagaa dhiyeessuun na simate" jedhan.

   Waraanni kasaaraa lubbuu lammiilee dhaqqabsiisus dubbatan Liyoon. Addunyaan maaliif dursa akka kennitu irratti waraanni madaallii dhabsiisa jedhan.

   "Gooftoliin waraanaa waraanni waan waraanni yeroo gabaabaatti mancaasu barootaaf deebisanii ijaaruun akka hin danda'amne kan hin beekne of fakkeessu" jedhan.

   "Dolaarri biliyoonaan lakkaawaman ajjeechaa fi mancaatiif dhangalaafamu, qabeenyi fayyinaaf, barnootaa fi dandamannaaf bahu garuu eessaallee hin argamu."

   Poop Liyoon "haalli kun karaa murteessaan jijjiiramuu qaba", jechuun obbolummaa ilmaan namaatiif waamicha godhan.

   Abdiis dubbatanii jiru Poop Liyoon.

   "Addunyaan akkuma abbootii irree hedduudhaan raafamaa jirtu, kanneen obbolummaa fi gaarii ta'ani hedduus qabdi".

6. 16 Ebla 2026Qabxiilee ijoo ibsa waraanaa Ameerikaa reefu kennamee

   Ministirri Ittisaa US Piit Hegseet, Dura taa'aan ajajoota waloo Jeneraal Daan Kaayinii fi Ajajaan Ajaja Giddu-galeessaa US (Centom) Admiiral Biraad Kuuppar ibsa kennaniiru.

   Dhimmoonni ibsa kanneen keessatti ka'an kunooti:

   • Hesgeet Iraan marii US waliin gootu keessatti filannoo isheerratti of eeggannoo akka gootu akeekkachiisan. Waraanni keenya "fe'atee, qophaayee, ajaja qofa eeggataa jira" jedhan. Qaataa tuquu qofa eeggata jedhan.
   • US, Iraan "tasuma" akka nukilarii hin hidhanne ni mirkaneessiti. Kana immoo karaa salphaan ykn karaa hamaan gochuu dandeesssi jedhan.

   • Ministirri Ittisaa kun US uggura kan hojiirra oolchite humna galaanarraa qabdu keessaa "10% gadi" fayyadamuun akka ta'e Iraan beekuu qabdi jedha.
   • Iraan dooniiwwan galaanaa ugguruun "shiftooma galaanarraati" malee to'annoo miti jedhan.

   • Jeneraal Kaayin gama isaaniin haasawa Hegseet kana jabeessan. Humnoonni US "akeekkachiisa tokko malee" haleellaa itti fufuuf qophii dha jedhan.
   • Uggura dooniiwwnaii ilaalchisee, hanga ammaa dooniiwwan 13 yeroo ajajamanitti ofirra deebi'uusaaniin "filannoo sirrii" filatan jedhan. US hanga ammaa doonii takkallee hin to'annes jedhan.
   • Admiiral Kuuppar, kan Baha Jiddugaleessaa daawwatanii reefuma deebi'an, US yeroo dhukaasi dhaabbate kanatti tooftaa fi teeknika ishee keessa deebiin ilaalaa jirti jedhan. Baha Jiddugaleessaatti michuu akka Israa'el immoo hin qabnu jedhan.

7. 16 Ebla 2026Ajaji Giddugaleessaa US (Centcom) humnoonni US 'tooftaa fi teeknika' isaanii mijeeffachaa jiru jedhan

   Ajajaan Ajaja Giddugaleessaa US, Admiral Biraad Kuuppar, ibsa kennaniin guyyoota 15 darban yeroo lama Baha Jiddu-galeessaa daawwachuu ibsan.

   Ajajaan kun yeroo kanatti, humnoonni US "tooftaa fi teeknika akkasumas adeemsa isaanii mijeessuurratti argamu" jedhan.

   Kuuppar michuuwwan keenya naannichaa waliin haala nageenya haaromsuuf mari'achaa jirra jedhan. Michummaan akkasii waan addaatis, michuu gaarii dhas jedhan.

   Israa'el caalaa "michuu gaariin hin jiru", jedhan. Israa'elii fi US "rra deddeebiin" kaayyoo waraanaa milkeessani jedhan.

8. 16 Ebla 2026Ulaa Galaanaa dhabuun icciitii akka hin dhokfanne nu godhe - MM Abiy

   Itoophiyaan ulaa galaanatti ishee baasu argattu malee naannawi Gaanfa Afrikaa nagaa hin argatu jedhan Ministirri Muummee Abiy Ahimad.

   Biyyoonni ollaa Itoophiyaa ulaa galaanaa 'dhoowwachuun' sirrii miti jechuunis himan.

9. 16 Ebla 2026Israa'el riqicha kibba Libaanos kutaa biyyattii kaanin wal qunnamsiisu barbadeessite

   Qondaalli olaanaan Libaanos tokko Rooytarsitti akka himetti haleellaa qilleensaa Israa'el raawwachaa jirtuun riqichi kibba Libaanos kan kibba biyyattii kutaa biyyattii kaaniin wal qunnamsiisu barbaadaaye.

   Miidiiyaa mootummaa Libaanos National News Agency akka gabaasetti riqichi Qaasmiyeeh, kan naannawa Taayir Siidooniin wal qunnamsiisu, haleellaa marsaa lamaatiin guutumatti barbadaaye.

   Israa'el humnoonni ishee Hizboolaan bu'uuraa biyyattii akka dhimma hin baanef riqichoota isheerratti xiyyeeffachuun akka haleeltu beeksiftee turte.

   Haleellaawwan kunneen kan raawwatamaa jiran ministirri muummee Israa'el Beenjaamin Neetaniyaahuu pireezdaantii Libaanos Jooseef Oowin waliin dubbachuuf akka jiran wayita eegamaa jiranitti.

   Kun kanaan osoo jiruu haleellaa raawwatame hordofee magaalaa uummanni 400,000 keessa jiraatu Nabaateeh keessaa aarri samiitti ol aaru mul'ataa jira.

10. 16 Ebla 2026Libaanositti dhukaasa dhaabuun hanguma Iraan keessatti dhukaasa dhaabuu murteessadha- Afyaa'ii paarlaamaa Iraan

    Akka gabaasa miidiyaalee Iraanitti, Afyaa'iin Paarlaamaa Iraan,Mohammad-Bagher Ghalibaf gita isaanii Libaanos Naabih Beerii waliin bilbilaan haasawanii jiran. Af-yaa'ichi "Libaanos keessatti dhukaasa dhaabuun Iraan keessatti dhukaasa dhaabuudhaan wal qixxee barbaachisaadha"

    Gaalibaaf, "wayita marii nagaa US waliin Islaamaabaadii fi achii boodas, "Iraan masaanuun ishee karaa fulla'aan dhukaasa dhaabuu malee filannoo akka hin qabaannef carraaqqii obsa fixachiisaa goote" jedhan.

    Har'a Hoggana Olaanaa waraanaa Paakistaan Fiild Maarshaal Asiim Muniir waliin wal arguusaanii miidiyaalee Iraan gabaasanii jiru.

    Jilli Paakistaan gara Teehraan imaluun dhimma dhukaasa dhaabuu US fi Iraan mari'achuu gabaafame.

    Ghaalibaaf namoota ijoo yeroo waraanaa Iraan kan turan yoo ta'u, nama gama Iraaniin jila marii nagaa US fi Iraan dursuun Paakistaan turedha.

    Dubbii-himaan ministira dhimma alaa Iraan Esmaa'il Baaghee mariin nagaa Islaamaabaad bu'aa malee xumuramuu boodas kaleessa waliin dubbiin Teehraanii fi Waashingtan DC jidduu karaa Paakistaan "itti fufuu" himanii turan. Garuu carraa yeroo dhukaasa dhaabuu dheerachuu hin mirkanoofne.

11. 16 Ebla 2026Suuraafi viidiyoo yeroo Israa'el gandoota Libaanos barbaadeessitu agarsiisu

    Magaalonniifi gandoonni Libaanos kibba keessa jiran yeroo Israa'el barbadeessitu viidiyoo fi suuraawwan satelaayitii BBC Verify argate mul'isan.

    Suuraawwaniifi viidiyoowwan saatelaayitii kunneen miidhaan haleellaa Israa'el gaggeessitu hangam akka hamaa ta'e mul'isu.

    Akka xiinxalli BBC Verify agarsiisutti, Bitootessa 2 irraa kaasee gamoowwan 1,400 barbadaa'aniiru.

    Viidiyoon argitan kun miidhaa bal'aa magaalotaafi gandoota barbadeessa bal'aa keessaa muraasa yoo ta'u, miidhaan qaqqabe heddu kanarra bal'aadha.

    Gochi ta'e jedhamee magaalotaafi gandoota kanneen mancaasuu yakka waraanaa ta'uu akka danda'u ogeessonni seeraa idil-addunyaa BBC Verufy'tti himaniiru.

12. 16 Ebla 2026Israa'el kibba Libaanositti buufataalee Hezboollaa 70 mancaase jette

    Waraanni Israa'el kibba Libaanos iddoowwan Biint Jabeeel jedhamutti buufataalee Hezboollaa 70 mancaase jedhe.

    Ibsi Telegiraamii irratti bahe ministirri mummee Israa'el Beenjaamiin Netaaniyaahuu kaleessa ''qubsuma Hezboollaa jabaa'' haxaa'uu jala geenyeerra jechuun dubbateera.

    Har'a immoo waraanni Israa'el haleellaa diroonii Libaanosirraa itti darbatame qolochuu hime.

    Tuutni bidiruu humna galaanaa Israa'el oppireeshinii 40 irratti hirmaachuun kana dhugoomsuu hime.

13. 16 Ebla 2026Ameerikaan dooniwwan buufata boba'aa Iraan seenuf yaalaan 10 duubatti deebisu himte

    Ameerikaan yeroo humni galaanaa ishee buufata boba'aa Iraan ugguree jirutti dooniiwwan 10 gara san dhaquuf yaalan deebisuu beeksiste.

    Waraanni Ameerikaa erga uggurri kun wixata darbe labsamee kaasee dooniin tokkollee akka bakka buufata boba'aa Iraanitti hin dabarre ibsa

    Ajajni Giddugaleessaa Ameerikaa akka jedhetti humnoonni isaa dooniiwwan gara qarqara galaanaa Iraan seenaan ykn ba'an duubatti deebisna jedhan. Doonii bakka biraa irraa dhufan ykn deeman ulaa Hormuuz keessa akka darban ni hayyamama jedha.

    Ajajni Giddugaleessaa Ameerikaa kaleessa galgala odeeffannoo haaraa kenneen, “amma dooniiwwan 10 akka ofirra deebi'antaasifamuu fi dooniin uggura kana cabse tokkollee akka hin jirre'' ibseera.

    Prezidaant Doonaald Tiraamp uggurri kun Iraan irratti dhiibbaa akka godhu abdatu. Galmi isaas kaffaltii Iraan boba'aa irraa argattuu kutuu fi boba’aan Iraan akka alatti hin ergamne taasisuudha.

    Iraan uggura kana “wanbadummaa” jetteetti. Teehiraan dooniiwwan Galoo Galaana, Galoo Galaana Omaan fi Galaana Diimaa irratti xiyyeeffachuufis doorsifteetti.

14. 16 Ebla 2026Hezboollaa hidhannoo hiikkachiisuun hariiroo Israael-Libaanooniif 'murteessaa dha' - MM duraanii Israa'el

    Libaanoos Hezboollaa hidhannoo hiikachiisuuf kutannaan hariiroo Libaanos Israa'eliif ''akkaan murteessaa taha,'' jedhan ministarri mummee duraanii Isaraa'el.

    Ihuud Olmeert, ''Hezboollaan hidhannoo hin hiikkatu taanaan mootummaan Israa'el kamiyyuu tarkaanfii waraanaa dhaaba jedhee hin yaadu,'' jechuun dubbatan.

    ''Yoo Libaanoos Awurooppaa, Israa'el fi Ameerikaa waliin tahuun Hezboollaa hidhannoo hiikkachiisuuf yoo hojjetan ''akkaan murteessaa taha, amma garuu kuni waan tahaa jiru miti,'' jedhe.

    Marii biyyoota lameen gidduu adeemuuf jedha isa jedhamus quba akka hin qabne Olmeert dubbataniiru.

15. 16 Ebla 2026Netaaniyaahuun pireezidantii Libaanos waliin wal-arguufi - Qondaala Israa'el

    Ministarri Mummee Israa'el Beenjaamiin Netaaniyaahuu Pireezidantii Libaanoos Jooseef Oowuun waliin wal arguuf tahuu miseensi kaabinee nagneenyaa Gaaliyaa Gaamli'eel miidiyaa Israa'el 'Army Radio' jedhamutti dubbate.

    Kunis erga Pireezidanti Donaaldi Tiraamp miidiyaa hawaasaa 'Truth Social' irratti Roobii galgala hogganoonni Libaanosiifi Israa'el 'bor' wal argu jechuun dubbataniin booda dhagahame jedhe.

    Gaafa Kamisaa qondaalli waajira pireezidantii Libaanos wal-argaa kana quba akka hin qabne himee ture.

    Amma garuu mariin kuni waa mirkanaa tahuu hubachuun danda'ameera.

16. 16 Ebla 2026Chaayinaan Iraan ulaa Hormuz banuun gara idileetti akka deebi'u gaafatte

    Ministirri Dhimma Alaa Chaayinaa Waang Yii Ministira Dhimma Alaa Iraan Abbaas Araaghchi waliin haasa’uun tarkaanfiiwwan geejjibaa idilee turetti deebisuuf akka fudhataman gaafataniiru.

    Wang akka jedhanitti, abbaa biyyummaa fi nageenyi Iraan ulaa kana keessatti qabdu kabajamuu fi eegamuu qaba. Bilisummaa fi nageenyi doonii mirkanaa’uu akka qabus cimsanii dubbataniiru.

    Daandii bishaanii kana deebisanii banuuf fedhiin idil addunyaa guddaan akka jirus eeran.

    Chaayinaanis dhukaasa dhaabuun akka itti fufu fi marii deebi’ee jalqabuu ni deeggarti jedhan.

    Chaayinaan maamila boba’aa Iraan ishee guddaa waan taateef, Ameerikaan buufata doonii Iraan ugguramuus ta'e ulaan Hormuuz cufamuun dinagdee ishee irratti balaa qaba.Kanaaf yoo danda'me gama Iraanis ta'e Ameerikaan dhiibbaa uumuu barbaaddi.

    Tiraamp kaleessa Chaayinaa waliin dubbachuu fi wal tumsuuf walii galuu isaanii dubbachuun ulaan Hormuuz banamuun Chaayinaa kan gamaachiisu ta'uu himan

    Ameerikaa fi Iraan giddutti waligalteen dhukaasaa dhaabuu taasifamus muddamni naannawa ulaa Hormuuzin wal qabatu ammallee furmaata hin argatin jira.

17. 16 Ebla 2026US yeroo Ulaa Hormuuz Iraanitti cuftee jirtutti, lamaanuu marii al-kallattii gaggeessaa jiru

    Waayit Haawus akka ibsetti US Iraan waliin al-kallattiin marii "bu'a qabeessa" jedhe geessaa jirti. Gama biraan ammoo dooniwwan daldalaa buufataalee daldalaa Iraan seenanii akka hin baane balbala Hormuuz itti cuftee jirti.

    Qabxiileen ijoon marii US-Iraanifi Israa'el-Libaanos akka armaan gadiitti dhiyeessine:

    Marii US-Iraan

    • Wayit Haawusifi Tehraan qaaman deebi'anii wal-arganii mariyachuuf karaa qaama sadaffaa ergaa wal-jijjiiraa jiraachuu Waayit Haawus mirkaneesse. Haa ta'u garuu, waliigalteen dhukaasa dhaabuu akka taasifamu kan gaafate USdha oduun jedhu soba jedhe.
    • Pirees Sekireetariin Waayit Haawus Kaarolaayin Liivit akka jettetti, US waa'ee waliin dubbii karaa qaama sadaffaa Iraan waliin gaggeeffamaa jiruu gammadduu ta'uu ibsuun biyyoonni lamaan qaaman wal-arganii mariyachuuf hanga ammaa guyyaan adda hin baane jette.
    • Gama biraan ammoo biyyoota lamaan walitti fiduun jaarsa araaraa taatee kan tajaajilaa jirtu Paakistaan jilashee gara Iraanitti ergiteeti.

    Cufamuu Ulaa Hormuuz

    • US dooniwwan daldalaa kamiyyuu buufataalee doonii Iraan seenanii akka hin baane uggura keesse akkuma itti fufetti jira. Waayit Haawus akka beeksisetti, humni galaanaa US haala milkaa'een Ulaa Hormuuz Iraanitti cufee jira.
    • Ajaji Giddugaleessaa US erga uggurri kun hojiirra ooluu eegalee, dooniin waraanaa kamiyyuu buufataalee doonii Iraan seenanii akka hin baane beeksise.
    • US Ulaa Hormuuz Iraanitti cufuu hordofee dooniwwan gara buufataalee doonii Iraan imaluuf turan ofirra deebi'uu BBCn mirkaneeffateera.

    Lola Israa'elifi Hezbollaa

    • Libaanositti lolli Israa'elifi Hezbollaa gidduutti gaggeeffamu itti fufeera. Washingtanitti mariin Israa'elifi Libaanos gidduutti akka gaggeeffamu Tiraamp beeksisus, waraanichi hanga ammaa hin dhaabbanne.

    • Ministiirri Muummee Israa'el Beeniyaamiin Netaaniyaahuu, biyyisaanii haala dhufu kamiifuu qophii ta'uu iban.
    • Kibxata darbe mariin Israa'elifi Libaanos UStti taasisan "marii bu'a qabeessa" ta'uu Libaanos beeksiftee turte.

18. 16 Ebla 2026Ashamaa!

    Tamsaasi kallattii BBC Afaan Oromoo kan har'aa eegaleera.

    Waayit Haawusiifi Tehraan walitti deebi'anii waraana dhaaburratti mariyachuuf karaa qaama sadaffaa ergaa wal-jijjiiruu itti fufaniiru.

    Israa'elifi Libaanos ammoo Washingtanitti wal-arganii mariyachuuf akka jiran Tiraamp beeksise.

    Odeeffannoo waktaawaa isin biraan geenyu karaa Marsaritii, YouTube, Whatsapp, fi Facebook keenya hordofuu dandeessu.

    Dhiyaadhaa!